Четвртата генерација на Škoda Fabia го продолжува започнатото со Octavia во поглед на кокпитот. Чесите ветуваат подобро просторно чувство, свежи бои и технологии од поголемите модели.
Škoda открива нови детали за новата Fabia и со цртежот на внатрешноста најавува што може да се очекува кај новиот модел. Во кабината на популарниот градски автомобил – и најважно, наследник на нам во Македонија одлично познатите бестселери Favorit и Felicia – се најавува уште повеќе простор и подобро чувство за просторност, заедно со свежи бои. Премиерата е планирана за почетокот на мај.
Четвртата генерација на Fabia првпат ја користи платформата MQB-A0 на концернот Volkswagen. Тоа прави возилото да биде подолго и пошироко од претходниците. Кокпитот е изведен симетрично, со средишно поставен дисплеј што стои слободно на арматурната табла. Со украсна лајсна во ефектна боја се нагласува ширината на кабината.
Од Octavia е познато дека карактерната линија под дисплејот верно ја следи линијата на маската на Škoda. Нагласок во внатрешноста ставаат и тркалезните отвори за воздух лево и десно, исто како и украсите во средишната конзола и хромираните рачки за отворање на вратите со нов дизајн. Слично како кај новиот Mercedes C-Class, повеќе нема вертикален дел од потпирачот за рака во вратата, што продолжува нагоре и непотребно го стеснува просторот.
На цртежот се забележува и голем дисплеј на местото на класичните инструменти, со неколку можности за возачот да го избере приказот во нив, познато од поголемите модели на Škoda.
