Уште еден голем ден во историјата на 13-децениската марка: 27-ми април е датумот кога е испорачан првиот примерок од првиот модел од новата генерација електрични возила на Škoda. Шампионите во електромобилноста, скандинавските држави, први добија контингент од Škoda Enyaq iV, во мај и јуни ќе следат Западна и Централна Европа.
Првиот примерок од Enyaq iV за приватен сопственик беше испорачан денес во норвешкиот Мос, на семејството Еспелунд/Талсете. Менаџерите на огранокот на Škoda во земјата очекуваат рекордна година, имајќи предвид дека постои голем интерес за електричните автомобили, а Enyaq iV е меѓу најнапредните и најспособни СУВ-модели на струја што моментно се достапни во компактниот сегмент.
Сопствениците на славеничкиот примерок од електричниот СУВ се Силје Талсете и нејзиниот партнер Ојвинд Еспелунд. Тие се решиле за Škoda Enyaq iV поради досегот, просторноста и привлечната цена. Кога ја направиле нарачката, тие можеле да го видат моделот само виртуелно. Затоа беше големо и изненадувањето, пријатно секако: „Слушнав дека Enyaq iV е просторен, но немаше да замислам дека ќе има толку просторна внатрешност. Посебно ме радува големиот багажник, што е од голема корист за млади семејства како нашето,“ изјави Ојвинд Еспелунд.
Enyaq iV е прв сериски модел на Škoda што е изработен врз модуларната електрична платформа MEB на групацијата Volkswagen. СУВ-моделот беше одликуван со пет ѕвезди и најдобра можна заштита на патниците на тестот за безбедност на Еуро НЦАП. Електричниот автомобил неодамна одвои награда и за својот дизајн, во рамките на Red Dot Award.