за

Рејнџ Ровер организира тренинг за луксуз, три дена отмено јадење и спиење

Отменоста се учи, стекнувањето благороднички навики е вежба. Тоа е суштината на дводневниот возачки излет, што Рејнџ Ровер го организира во Каталонија.

Како секоја марка што допира до клиенти кои за својот автомобил плаќаат колку за два стана што ќе усреќат секое семејство, така и Рејнџ Ровер организира настани за своите клиенти, за уживање во автомобилите и сé околу нив. Цената на овој несекојдневен туристички аранжман не би требало да е изненадување.

Туристичката „агенција“ на Рејнџ Ровер, за годинава има подготвено уште едно посебно доживување за клиентите на „куќата на брендовите“ и за тие што сакаат да станат дел од фината клиентела. Под Каталонија Травел Експериенс, односно Доживејте ја Каталонија низ патување, британската марка нуди „иконски сценарија и вечера со ѕвезди од мишелин“, стои во брошурата.

Станува збор за тридневно истражувачко патување низ живописниот регион на Каталонија – во Рејнџ Ровер. Тоа се предели што се вбројуваат меѓу гордостите на Шпанија, во коишто човек може да се запознае со природните обележја, но и со културата, градбите и општо историјата на тој дел од Иберискиот Полуостров.

Програмата меѓу другото предвидува и возење Рејнџ Ровер до манастир на врвот на планинскиот масив Монтсерат, во близина на Барцелона, а откако ќе се дојде на дневното одредиште, уживање во вино од најпрефинета винарија, вечера во ресторан што има ѕвезди Мишелин, а нема да отсуствува и киснење во спа.

Експертите на Рејнџ Ровер имаат избрано и посебна теренска патека, на којашто ќе се покажат и врвните теренски својства на ултралуксузниот, но пак теренски способен автомобил.

Еден од двата ексклузивни хотели во коишто се престојува

Британците имаат предвидено пет термини, сите во септември, почнувајќи од 11-ти до 14-ти септември, па натаму. Цената е посебно интересна. Во брошурата стои 8.250 фунти по човек, а тоа значи двојно повеќе, затоа што аранжманот важи за пар. И таа цена е само информативна, затоа што повеќето учесници избираат и посебни погодности за време на настанот.

За каков ексклузивен настан се работи, говори и фактот што за секој термин се предвидени по 10 учесници.

Вебсајтот за настанот

https://www.landrover.com/experiences/travel/catalonia/index.html

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Форд ги запре нарачките на батерии, губи 100.000 долари од секој електричен автомобил

Рено им продава дизел мотори на клиенти, турски Абаш се јави прв