Дарко Јаконов
Поради растечката продажба на СУВ-модели, но и големиот број на новорегистрирани електрични автомобили, просечната цена на новите автомобили што германските возачки и возачи ги избирале годинава е многу повисока отколку лани.
Купувачите во Германија годинава во просек даваат повеќе пари за своите нови возила. Просечната цена според редовните ценовници се зголемила за 8,1 проценти и изнесува 37.710 евра. Ова зголемување се должи првенствено на растечката продажба на СУВ-модели во градската класа, на зголемениот интерес за премиум марките, како и на возилата со електричен погон.
Според пазарните аналитичари, во услови на корона-кризата се купуваат многу поскапи нови автомобили. Покрај желбата на бројни купувачи да поседуваат поквалитетен и поскап автомобил, за зголемувањето на просечната цена придонесе и државната „иновациска премија“ за возила со елеткричен и со приклучен хибриден погон.
Уделот на овие возила со целосно или делумно електрифициран погон се зголеми во споредба со минатата година и моментно изнесува близу десет проценти. Државната субвенција во висина до 9.000 евра за електрични возила не е земена предвид при пресметката на просечната цена. Пазарот пријавува и зголемен удел на СУВ и луксузни автомобили од марките Audi, BMW, и Mercedes-Benz.
