Кога купувате нови гуми, продавачот обично не прашува за димензијата на гумите на предната и на задната оска. Тоа е случај кај суперспортските автомобили, а во последно време е популарна опција и кај стандардните модели со високи перформанси. Причините се јасни, следи еден кус опис.
Некои автомобили имаат различна димензија на гумите на предната и на задната оска. Во таков случај, на задната оска обично се вградуваат пошироки гуми, со соодветно помала висина на каскадата. Причината за тоа е иста со причината зошто моќните автомобили имаат погон назад: При забрзување, задната оска се оптоварува повеќе отколку предната оска. Поширока гума обезбедува и поголема газечка површина, а тоа значи и поголема површина на којашто се пренесува моќноста од тркалата врз асфалтот.
Од друга страна, соодветно потесни гуми на предната оска се од корист, затоа што тие овозможуваат подобра управливост и поголема агилност при влегување во свијоци или изведување одредени маневри.
Porsche 911 Turbo S, на пример, стандардно доаѓа со гуми со димензија 255/35 ZR 20 напред и димензија 315/30 ZR 21. Тука не се разликува само ширината на гумата и висината на каскадата, туку има разлика и во пречникот на тркалата. Германскиот болид со 650 КС и вртежен момент од 800 њутнметри, што се распределува до сите тркала, на предната оска користи тркала со димензија 9 J x 20, додека тркалата назад имаат димензија 11,5 J x 21. Дополнително проширената трага на задната оска, поради неопходноста од беспрекорна тракција, прави и каросеријата на 911 Turbo да биде за околу педесетина милиметри поширока отколку кај 911 Carrera.
Porsche 911 Turbo S
Пошироки гуми на задната оска денес може да се нарачаат и фабрички, обично кај лимузините или СУВ-моделите со повисоки перформанси, но и општо кај премиум марките. Mercedes-Benz, на пример, во пакетот за надворешност AMG Line, вклучува гуми со димензија 225/40 R 19 напред и 255/35 R 19 назад, соодветно со тркала со димензии 7,5 J x 19 ET 40, односно 9 J x 19 ET 58,1. Тоа е пакет што стои на располагање и во C 180. Според германскиот ценовник, оваа опција чини околу 1.370 евра.
Mercedes-Benz C-Class
Експерименти на сопствена рака не се препорачливи, дури се и опасни, затоа што може да дојде до несакана промена на возните својства и на непредвидливо однесување во возењето. Тоа би бил спротивен ефект. Производителите на автомобили, кога нудат опција за гуми и тркала со различна големина на предната и задната оска, вршат и соодветно дотерување на подвозјето. Тоа обично вклучува и приспособување на системите за стабилност.
Audi RS 3 Sportback
Audi RS 3 е меѓу ретките, ако не и единствен модел на пазарот во моментов, кај којшто може предните гуми се пошироки, отколку назад. Станува збор за нагласено спортски модел со врвни перформанси, со 400 КС, со 500 њутнметри и погон на сите тркала quattro. Предните гуми кај RS имаат димензија 265/30 R 19, задните 245/35 R 19. Има разлика и во ширината на тркалата, напред 9,0 J x 19, назад 8,0 J x 19. Тоа се должи на обемни тестирања и проби, во коишто динамичарите на Audi утврдиле дека е предност, ако напред се наоѓаат поголемите тркала. На тој начин, меѓу другото се компензира и за релативно повисокиот процент од тежината на возилото што паѓа врз предната оска.
Порано во одредени држави не се дозволуваше регистрирање автомобил со различни димензии на гумите и на тркалата на предната и на задната оска. Тие закони повеќе не важат.