за

Opel Grandland со нов лик стартува со производство во Ајзенах

Во фабриката на Opel во германскиот град Ајзенах започна производството на освеженото годиште на компактниот СУВ-модел Grandland.

Наследникот на Opel Antara има нос во стил на Mokka, достапен е во изведби со приклучен хибриден погон и располага со целосно дигитален кокпит. Испораките на првите европски пазари ќе стартуваат веќе во февруари.

Започна редовното сериско производство на новото моделско годиште на Opel Grandland во Ајзенах. На свечениот чин присуствуваа извршниот директор на Opel, Уве Хохгешурц, и премиерот на сојузната покраина Тиринген, Бодо Рамелов. Славеничкиот примерок од моделот што ја наследува низата Frontera – Antara е во изведба со приклучен хибриден погон со системски 300 КС, погон на сите тркала и врвно ниво на опрема Ultimate.

Концернот Stellantis, каде што припаѓа Opel како дел од PSA, есеноска најави можност за затворање на фабриката во Ајсенах, поради рационализација на производствената мрежа. Тогаш се појавија на протести организираните работнички синдикати. Менаџментот и државата реагираа брзо, така што иднината на историската фабрика во Тиринген е обезбедена, со производството на Grandland.

„Нé радува што новиот Opel Grandland се произведува во Ајзенах“, изјави Ксавиер Шеро, претседател на надзорниот одбор на Opel и главен кадровик во Stellantis. „Социјалниот дијалог повторно доведе до конструктивни решенија, коишто направија да се зголеми конкурентноста на фабриката – тоа е посебно важно додека се случува голема пресвртница во автомобилската индустрија.“

New item by Automedia MK / Google Photos

Opel ја продолжува својата стратегија за електрификација со новиот Grandland и го нуди компактниот СУВ-модел во две изведби со прикчучен хибриден погон. Grandland Hybrid располага со системски 224 КС и 360 њутнметри, коишто преку осумстепен автоматски менувач се пренесуваат на предната оска. Втората изведба располага со втор електромотор, преку кого што се постигнува и погон на сите тркала. Opel Grandland Hybrid4 доаѓа до 300 КС и 520 њутнметри, задржувајќи ја воедно примерната штедливост и ниска емисија на „послабиот“ модел.

Grandland ја дели техниката со Peugeot 3008 SUV, 5008 SUV, со Citroen C5 Aircross и со DS 7 Crossback. Моделската изведба Grandland Hybrid4 ја користи истата погонска спрега како уникатниот Peugeot 3008 Hybrid4 Black Pack што ја имавме на тест лани.

Увозникот Еуроимпекс уште во декември ги објави цените за моделската 2022 година на Opel Grandland. Редовната цена за најдостапната моделска изведба на македонскиот пазар, Grandland 1.2 DI со 130 КС и основно ниво на опрема, изнесува 26.570 евра. Опременоста на „новата Frontera“ е богата уште во основното ниво и вклучува автоматски двозонски клима-уред, диодни предни и задни светла, систем за задржување во лента, автоматско долго светло, камера за знаци, темпомат, дигитални инструменти од 7 инчи и средишен дисплеј од 7 инчи, електрична паркирна сопирачка и тркала од лесен метал.

Моторот со 130 КС е достапен во комбинација и со 8-степен автоматски менувач (од 28.480 евра), а единствен дизел е 1,5 литарец со 130 КС, којшто стандардно доаѓа со автоматски менувач и чини 31.110 евра, во основното ниво на опрема.

>>> Peugeot 3008 Hybrid4 е лав со одмерен залак


Целата моделска понуда на Opel на македонскиот пазар, со технички податоци, опрема и цени за секој модел, можете да ја погледнете во нашиот онлајн-каталог https://avtosalon.mk/

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Милионери ќе наддаваат за три историски Mercedes-Benz 300 SL

Рекорд на Rolls-Royce, лани испорачани повеќе од 5.000 автомобили