Голем број држави имаат поставено краен датум до којшто ќе се дозволува регистрирање возила што користат бензински или дизел мотор. Тоа го забрзува преоѓањето од обичен на електричен погон, затоа што на граѓаните им се укажува навремено, за соодветно да се раководат при купувањето автомобил. Електробилноста во Норвешка напредува подобро од плановите.
Од Автомобилското здружение на Норвешка предвидуваат дека електричните возила целосно ќе ги потиснат од пазарот возилата со погон со мотор со внатрешно согурување веќе во април 2022 година. За малку повеќе од седум месеци, секој автомобил што ќе се регистрира во скандинавската држава ќе користи чисто електричен или електрифициран, односно хибриден погон.
Здружението за своето предвидување се повикува на динамиката на продажбата на електрични автомобили во земјата во изминатите години. Додека автомобилите со бензински или дизел мотор учествувале со 25 проценти во вкупната продажба на нови автомобили во 2017 година, во првите осум месеци од годинава, нивниот удел е сведен на 4,93 односно 4,73 проценти соодветно.
Едно се предвидувањата, друго е реалноста. Во Норвешка сепак ќе продолжат да се продаваат нови автомобили со класичен погон до „крајната“ 2025 година. Станува збор за мали сегменти, како на пример автомобили со погон на сите тркала со достапна цена, како што се на пример моделите на Suzuki. Патем, и јапонскиот мини-специјалист веќе со години вградува исклучиво благ хибриден погон во своите модели.
Чисто електричните автомобили во 2019 година покривале близу половина од продажбата на автомобили во Норвешка. Во следната година, нивниот удел надмина 50% од пазарот, додека во последните извештаи од норвешкиот пазар, електричните автомобили учествуваат со 70 проценти во вкупниот пазар.