Браншата на секои две години патува за Париз, за таму да ги претстави најновите модели и студии. Иако годинава има помалку производители, новитетите не недостигаат. Прв преглед на тоа што публиката може да очекува на салонот покрај Сена
Во Париз уште од 1898 година се одржува „Mondial de l’Auto“, како еден од најважните салони за автомобилската бранша. За јубилејната 120-та година на „автомобилскиот мондијал“, производителите повторно најавија изобилство од новитети. Списокот е долг, иако неколку големи марки го откажаа своето присуство во Париз. Меѓу фирмите што воопшто нема да се појават на салонот се Volkswagen, Ford, Mazda, Volvo, Opel, Nissan и Alfa Romeo.
Причина за изостанувањето на салонот е тоа што производителите денес им даваат поголема важност на сопствените манифестации. На тој начин, тие го добиваат целото внимание од публиката и медиумите. Зад кулоарите се зборува и дека организаторите на големите автосалони наплаќаат премногу за штандовите на производителите.
Домашните производители уште се таинствени околу нивната постава за салонот во Париз
Светски премиери сепак нема да недостигаат: Пристигаат новиот Porsche 911 од генерацијата 992, новиот B-Class, серијата 3 на BMW, Hyundai i30N Fastback и Skoda Kodiaq RS. Тоа се само неколку од вистинските новитети што светот ќе ги види првпат на парискиот салон, од 4-ти до 14-ти октомври.
Некои марки пристигаат во Париз со салонски премиери. Тоа значи дека овие модели веќе имале премиера на други настани или се појавиле во медиумите. Меѓу најинтересните во оваа група новитети се новиот Audi e-tron, освежениот Porsche Macan, големиот СУВ-модел Seat Tarraco и DS 3 Crossback. Посетителите сигурно нема да ги прескокнат и новитетите, како што се комби изведбата на Toyota Corolla, Mercedes-AMG A 35 или Renault Mégane R.S. во лутата варијанта Trophy.
Вниманието ќе го привлекуваат и новите генерации на Audi A1 и A6 Avant, купето од серијата 8 на BMW – можеби во Париз ќе биде прикажан и концепт на кабриолетот во оваа моделска серија – исто како и родстерот Z4 и новиот теренец X5. Кај Mercedes е сосем извесно дека на штандот ќе се појави новиот GLE, заедно со лимузинската изведба на A-Class. Porsche може да ги прикаже силните варијанти GT4 и Spyder од 718 Cayman и Boxster.
Alpine може да изненади со студија на СУВ-модел
Покрај многубројните нови модели, во Париз по традиција се прикажуваат и неколку студиски автомобили и концепти. Две премиери се сосем сигурни, тоа се Skoda Vision RS и Peugeot e-Legend Concept. Француското купе со ретро стил и електричен погон несомнено ќе биде еден од главните магнети за публиката.
Французите ќе ја прикажат и комби-изведбата од новиот Peugeot 508, со традиционалната ознака SW. Важен новитет се и моделите од новата генерација плагин-хибриден погон во моделските серии 508 и 3008 на Peugeot. Уште не е потврдено дали и Alpine ќе се качи на возот на супербрзи СУВ-модели. Во халите на Париз Експо Порт де Версај, на крстосницата на Периферик со Булеварот на Маршалите, ќе продефилираат и голем број концепти со електричен погон.
Салонот ќе биде отворен секој ден од 10 до 20 часот, односно до 22 часот четврток и петок. Дневна карта чини 16 евра, најлесно се пристига со метро, со линија број 12.