Mitsubishi веќе го најавува вториот нов модел за Европа, што е развиен врз платформата CMF-B на алијансата со Renault и Nissan. Во класата на Yaris и 208 од следната есен ќе вози нова генерација на Mitsubishi Colt.
Новиот модел ќе стартува со продажба во Европа во следната есен, со техника од Clio и Micra, позициониран како автомобил од градската класа. Исто како кај францускиот модел, новиот Mitsubishi Colt ќе се нуди и во изведба со хибриден погон, како и со низа напредни системи за асистенција и поврзување.
Најавата за враќањето на моделското име Colt се совпаѓа со одбележувањето на 60-годишнината од првата генерација на моделот. Новиот Colt ќе донесе значајно зајакнување во присуството на Mitsubishi на европскиот пазар, во најважниот и најпродаван автомобилски сегмент на континентот.
Mitsubishi Motors Europe го враќа Colt во европскиот Б-сегмент по отсуство од близу 10 години
Новиот Colt ќе се придружи на постоечката моделска постава на марката, покрај Space Star, неодамна најавениот нов ASX и Eclipse Cross во изведба со приклучен хибриден погон.
Првиот Colt беше претставен во 1962 година и моделот низ годините прерасна во еден од најпрепознатливите автомобили во понудата на Mitsubishi во светски рамки. За штедливиот и солиден модел се отвори широк пазар во САД кон крајот на 1970-те години, во времето по големата нафтена криза.
Моделот од претходната генерација се произведуваше во Европа и постигна продажба од 403.957 примероци во периодот меѓу 2004 и 2014 година.
Се најавуваат повеќе нивоа на опрема, најсовремена технологија и разновидна понуда од погонски единици. Mitsubishi Colt ќе се произведува во фабриката на Renault во Бурза, Турција. Исто како следната генерација на ASX, новиот Colt ќе ја користи платформата CMF-B, позната од тековните Clio и Micra.