Наследник на прочуениот i-MiEV, еден од првите електрични автомобили за масовниот пазар, како и најава за иден спортски модел што ќе го носи знакот на Ralliart – тоа се двата концепти што Mitsubishi Motors ги потврди како премиера за салонот во Токио, што ќе се одржува меѓу 14-ти и 16-ти јануари.
За концептното возило што ја најавува новата генерација на малечкиот градски автомобил со погон чисто на струја, Mitsibishi открива дека тоа ќе биде автомобил со оригиналниот печат на марката, безбеден и комфорен. Меѓу целите при развојот било возилото да соединува лесно управување и да располага со мали димензии. Новиот „Mitsubishi EV“ ќе располага со солидни перформанси, ќе нуди напредни системи за асистенција, и секако, богати можности за поврзување со преносни уреди и користење онлајн-услуги. Серискиот модел EV ќе стартува со продажба напролет.
Јапонскиот производител што е дел од алијансата со Renault и Nissan, повеќе го држи во тајност вториот концептен автомобил за Токио Ауто Салон 2022. Под името Ralliart, коешто познавачите веднаш го поврзуваат со големите успеси на рели-патеките, вториот концепт ќе ги спои инженерингот на Mitsubishi Motors и страста за предизвици од типот на „Monozukuri“ (вештина на изработка).
Концептот на Ralliart ќе посредува чувство на премиум автомобил и ќе настапува со впечатлив стил, како предводник на визијата што компанијата ја има за нов Ralliart. На фотографијата што ја придружува најавата, прикажан е единствено масивниот заден дифузор, со стилизирана, но веројатно нефункционална издувна цевка во средината и со растер од ситни отвори за воздух по целата површина. Тоа навестува електричен погон со два електромотори и со врвни перформанси. Ефектот е постигнат, сцената со нетрпение очекува да ги види најавите за идните модели на Mitsubishi.
>>> Mitsubishi го враќа во игра името Ralliart