за

Мерцедес ја заврши 2023 по план, рекорди за Мајбах, Г-Класа и АМГ

Уште два милиони автомобили со ѕвездата на Мерцедес се пуштени да возат лани, стратегијата на Штутгарт повеќе е насочена кон профит, отколку кон раст на продажбата.

Групацијата Мерцедес-Бенц, во којашто покрај патничките автомобили спаѓаат
и вановите, лани произвела 2.491.600 возила, за 1,5 процент повеќе отколку преклани. Еден од секои пет автомобили е хибрид или електричен.

Токму најпрестижните модели што Штутгарт ги има во својата понуда, најмногу ја зголемија продажбата во минатата година. Мерцедес-Мајбах продаде за 19% повеќе возила, Г-Класа следи со +11 проценти, а Мерцедес-АМГ заокружува со раст од 4 проценти. Сите модели од Топ-Енд сегментот заедно, во последниот квартал од 2023 година напредувале за 17 проценти.

Шефот на групацијата, Ола Келениус, коментира за рекордот: „Нашите топ-енд модели, вклучувајќи ги Мерцедес-Мајбах, Г-Класа и Мерцедес-АМГ во 2023 година ја постигнаа најдобрата продажба досега… годинава ќе ја продолжиме динамиката со електричната Г-класа, со Мерцедес-АМГ ГТ Купе и со нашиот нов еСпринтер.“

Мерцедес-Бенц Карс лани продаде 2.043.800 возила, од коишто 328.200 примероци се од врвните моделски серии. Порасна побарувачката за Мерцедес-Мајбах (+19%), Г-Класа (+11%) и Мерцедес-АМГ (+4%). Од престижниот ван В-Класа и од неговата електрична изведба Е-Ку-Ве се продадоа 60.000 примероци.

Во последниот квартал беа продадени 514.000 патнички автомобили и ванови, вклучувајќи раст од 17 проценти кај моделите од врвните сегменти.

Мерцедес-Мајбах имаше за 19 проценти повеќе клиенти отколку преклани, благодарение главно на високата побарувачка за Мајбах ГЛС и за С-Класа. Во последното тромесечје започна и продажбата на електричниот Е-Ку-Ес на пазарот во САД. Остануваат уште неколку големи пазари за електричниот пандан на С-Класа, што ќе се комплетираат годинава. Во растот од 4 проценти кај АМГ, се вклучени и 76% повеќе возила од понудата на електрични модели со врвни перформанси.

Во главниот сегмент, лани се продадоа 1.096.800 возила (-2%), што се должи на тесните грла во снабдувањето со компоненти, како и генерациската смена кај Е-Класа. Кај бестселерот ГЛЦ беше проблем тоа што недостигаа батерии за 48-волтниот благ хибриден погон. Ц-Класата постигна раст од 10 проценти.

Мерцедес-Мајбах во нашиот онлајн-каталог со сите нови модели автомобили на македонскиот пазар АВТОСАЛОН.МК

Mercedes-Maybach S 680 4Matic

Во основниот сегмент беа испорачани 618.800 возила(+4%), за што најмногу заслуга имаат електричните Е-Ку-А (+57%) и Е-Ку-Бе (+109%).

Одлично напредуваат батериските електрични автомобили, со продадени 222.600 возила и раст од 73 проценти. Тоа одговара на удел од 11 проценти во вкупната продажба на Мерцедес-Бенц. Заедно со хибридите, уделот на модели со електрифицирана погонска спрега изнесува 19 проценти.

Електричната лимузина Е-Ку-Е, пандан на Е-Класа, постигна раст од 120 проценти во продажбата. Пазарот во САД регистрираше двојно повеќе електрични возила (+167%). Таму најмногу се бара Е-Ку-Е СУВ.

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Рено ја спушти цената на електричниот Меган за 10%, се бори против Тесла

Фабриката на Тесла во Берлин две недели нема да произведува