за

Г-Класа: Фини зафати пред да дојде електричниот „Гелендеваген“

Мерцедес-Бенц изврши неколку фини зафати кај својата Г-Класа, пред да ја вклучи електричната изведба во понудата на теренскиот класичар.

Уште еден круг освежување за Г-Класа, како подготовка за чувствителниот, но неминовен момент. Мерцедес наскоро ќе ја претстави пред светот првата електрична Г-Класа. Фејслифт, што не е фејслифт.

Заљубениците во Мерцедес и во автомобилскиот свет воопшто знаат дека годинава треба да сметаат на електрична Г-Класа. Традиционалниот производител сепак ѝ посветува внимание прво на изведбата на Г-Класа со мотори, од видот со којшто теренецот на луксузната марка изгради култ.

Швабите (Швабија е регионот меѓу Шварцвалд и Боденско Езеро, каде што припаѓа Штутгарт) во средината на април ќе ја прикажат целосно електричната Е-Кју изведба од автомобилскиот диносаурус, што ќе се случи на салонот во Пекинг. Пред тоа, менаџерите решија дека е добра одлука прво да ѝ посветат внимание на класичната изведба, со мотор под хаубата.

Исто како и во последните четири децении, однадвор не се распознава дека има големи зафати во изгледот. Најмногу што е сменето во неодоливата коцкеста каросерија е тоа што сега во маската има четири, место три ламели – освен во АМГ, каде што е друга приказна.

За Г-Класа барем малку да му олесни на воздухот да струи околу каросеријата, предните столбови се сменети, односно се заоблени. Има и мал спојлер горе. Тоа може да се забележи само одблизу, па и тогаш на втор поглед.

Многу е поголем обемот на промени во кабината и под хаубата. На Г-Класа ѝ се случи уште понапредна дигитализација, со екрани што сега се дел од кокпитот. Во теренецот работи најновото издание на системот за комуникација со возилото МБУКС.

Дизајнерите ја расчистија и средишната конзола и направија простор за климатизирани држачи за чаша и за новите УСБ-приклупоци. За патниците што не се толку импресионирани од теренските способности на Г-Класа, на задната клупа сега се вградува целосниот систем за забава од С-Класа.

Нема повеќе осум цилиндри во Г 500

Кај моторите е направена „мала“ отстапка како вовед за електричната Е-Ку-Ге, и додаден им е стартер-генератор со моќност од 20 КС и вртежен момент од 200 њутнметри, односно изведени се како благи хибриди.

 

Додека фановите на дизелот ќе се радуваат на новиот Г 450д, што мери 367 КС и за десет проценти повисока моќност од Г 400д, за фановите на Г 500 нема толку добри вести. Кај него отсега работат шест место осум цилиндри. За утеха, трилитарецот испорачува 449 КС, 560 њутнметри и забрзува до 210 километри на час.

Осумте цилиндри остануваат кај АМГ. Во АМГ Г 63 и натаму работи осумцилидарец, со 585 КС и 850 њутнметри. Тоа се претвора во спринт до темпо сто за 4,3 секунди и брзина што е ограничена на 240 километри на час.

За да може уште повеќе да се ужива во новата моќност, АМГ добива и ново подвозје. АМГ Рајд Контрол користи хидраулична стабилизација и го држи колосот исправено во свијоци, но во исто време се грижи и за добра тракција при возење по терен.

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Сцени од фабриката на Шкода: Како се вградува таблата со инструменти

Увозот на кинески електрични автомобили во ЕУ забави нагло