Mercedes-Benz честопати бил прв во браншата во примената на нови идеи и изуми, а тоа честопати доведувало и до многу радикални возила. Таков пример е студискиот автомобил F 400 Carving, што својата премиера ја имаше на салонот во Токио во октомври 2001 година.
Автомобилската сцена го виде Mercedes-Benz во дотогаш ретко познато светло, кога марката од Штутгарт го претстави својот студиски автомобил пред публиката на салонот во Токио пред 20 години. Јапонскиот салон беше точно избран, затоа што истиот со децении важеше како една од најрадикалните платформи за претставување на новите и најнеобични идеи на автомобилската бранша – сепак тоа е домашен терен на јапонските производители, што пред 20 години ја одушеуваа сцената со своите напредни замисли.
Посебноста на Mercedes-Benz F 400 Carving беше во отклонот на тркалата (нагиб) што се приспособуваше според свијокот и според брзината. Тоа беше голема атракција, автомобил со тркала што во свијоците се наведнуваат на спротивната страна, слично на карвингот што се користи при скијање. Секако дека F 400 Carving денес е дел од постојаната поставка во музејот на Mercedes-Benz во Штутгарт, во делот „Faszination Technik“ (одушевувачка техника).
Посебен систем го зголемуваше отклонот на тркалата од надворешната страна во свијокот до најмногу 20 степени. Заедно со новодизајнираните гуми со асиметричен профил, се постигнуваа сили на странично забрзување поголеми за 30 проценти во споредба со возилата со обична техника. Инженерите од Mercedes порачуваа дека тоа е подобро за безбедноста, иако повеќето ги привлекуваше токму спротивното, да влезат во свијок и да почувствуваат што значи за 30% поголема странична сила.
Со активното приспособување на отклонот, Mercedes F 400 Carving постигнуваше максимално странично забрзување од 1,28 g, што беше за 28 проценти подобро од тогашните спортски возила
Можноста за отклонот на тркалата да се зголеми за миг, на пример при опасност од излетување од свијок, значеше и можност за тогаш уште новиот систем за контрола на стабилноста ESP да изврши поагресивни зафати во сопирачките. Покрај тоа, со истовремено максимално отклонување на сите четири тркала, патот на сопирање од 100 km/h се скусуваше за пет метри.
Техничарите во Штутгарт извршија цела серија тестирања со F 400 Carving пред 20 години. Двоседот располагаше со управување и сопирачки во коишто се користеа електрични, место механички врски – тогаш малкумина веруваа дека техниката навистина функционира така, Mercedes зборуваше за „drive by wire“.
Уште една важна техника се испобуваше во „Carving“. Тоа е денешниот Active Body Control (ABC), со активна хидропневматика. Нова техника беа и ксенонските светилки, чијашто светлина преку оптички влакна се пренесуваше до самите светла. Трепкачите користеа светлечки диоди и „леќи“ во форма на призма. Место 12-волтна техника, возилото користеше четирипати повисок напон за напојување на потрошувачите.
Составот на каросеријата исто така беше сензација – карбон, во комбинација со школка од челик, алуминиум и повторно карбон. Тоа што изгледаше нереално во Mercedes-Benz F 400 Carving во 2001 година, денес во огромна мера е стандардна техника што се вградува во возилата.
>>> Mercedes E-Class веќе вози на струја: EQE по пример на EQS