Дарко Јаконов
Пилот-проектот во австрискиот град Грац ја докажа делотворноста на филтрите што се вградени во две поштенски возила Mercedes-Benz eSprinter. Возилата досега имаат поминато 6.400 километри во разнесување пратки, филтрите се полни со нечистотијата што е собрана од воздухот.
Добар квалитет на воздухот во градовите е еден од клучните фактори за добар квалитет на живеење во урбана средина. Колку може да биде загаден воздухот со неразградливи честички, односно PM-честички, доколку надлежните институции се однесуваат несовесно и неодговорно, секоја зима се покажува во градовите во Македонија. Европа постигна исклучителен напредок во спречувањето на емисијата на PM-честичките, но се продолжува во насока на натамошно намалување на присуството на овие честички во воздухот.
Mercedes Benz Vans, Австриска Пошта и производителот на филтри MANN+HUMMEL во август започнаа пилот проект во Град. Во две сериски возила eSprinter, патем возила со чисто електрилен погон, вграден е филтер за неразградливи честички во предниот дел од возилото. Возилата се во редовна служба во центарот на Грац.
Комбињата дневно минуваат во просек по 53 километри. На една тура, двата eSprinter во просек разнесуваат по 160 пакети и притоа запираат околу 100 пати. Од почетокот на проектот, возилата за 60 денови во служба собраа по 6.400 милиграми прашина од воздухот. Учесниците во проектот го оценуваат истиот како успешен. Можеби 6.400 милиграми или 6,4 грами се чинат малку, но станува збор за прашина, а тоа е веќе значајна количина.
Филтрите по 60 денови во сообраќај се заситени само 15 проценти, проектот продолжува до средината на 2023 година
Во проектот учествува и Институтот за Енергија и техника за животна средина во Дуизбург. Иницијативата се совпаѓа со концептот на Австриска Пошта, којшто се води како „Зелен Грац“. Од ноември 2021 година, Поштата купува само чисто електрични возила за достава на пакети, писма, брошури и весници. Целта е да се намали емисијата на СО2 и бучавата во градот. Од 2030 година, поштата во Грац ќе се разнесува само со електрични возила.
View this post on Instagram
