Дарко Јаконов
Дефиницијата за луксуз во Mercedes доби дополнително значење. Исто како што S-Class е врв за целата автомобилска бранша, така Mercedes EQS е врв за електричниот огранок на истата таа бранша. Од денес во новата фабрика во Зинделфинген се произведува луксузниот крсосувач на струја.
Флексибилно, дигитално, ефикасно и одржливо. Тоа се принципите врз коишто Mercedes денес го заснова своето работење во секој поглед. Mercedes EQS е првиот целосно електричен модел од фабриката што беше изградена „од ново“ во Зинденфинген, посебно за новата S-Class, а со тоа и за нејзината електрична верзија. Од истите погони излегуваат и изведбата на S-Class со продолжена каросерија, како и благородничниот Mercedes-Maybach S-Class.
Посебноста на Фабрика 56 е во одржливоста, општо во грижата за животната средина и зачувувањето на ресурсите. Фотоволтаичките панели врз покривот на фабриката покриваат околу 30% од потребата од електрична енергија. Флексибилноста овозможува сите погонски варијанти да се произведуваат на иста лента.
Маркус Шефер, член на управниот одбор на Daimler AG и Mercedes Benz AG, одговорен за развој на техника и оперативен директор на Mercedes-Benz Cars: „Нашата нова целосно електрична луксузна лимузина EQS поставува нови мерила со досегот до 770 километри според WLTP. Во исто време, EQS е симбол за одржливоста во целиот синџир на создавање на дополнтиелна вредност, од развојот, преку набавката, производството и полнењето, до рециклирањето. EQS е камен темелник на патот кон нашата Амбиција 2039, со којашто Mercedes-Benz работи интензивно на возен парк од нови возила што е неутрален во однос на CO2.“
