за

Формата пред моторот: Мерцедес-АМГ со дволитарец за пуристи

Моќта на спортското купе на Мерцедес-АМГ е во дизајнот. Цената го објаснува додавањето на изведбата на луксузното купе со мотор од А 45 АМГ.

Тоа може да прерасне во нов тренд, како што впрочем му успевало многупати на Мерцедес-Бенц. Место моќноста да продолжи угоре, новиот тренд може да биде проширување на основата на понудата. Моќното и луксузно купе АМГ ГТ, добива изведба со 4-цилиндарскиот дволитарец од А 45 АМГ.

Мерцедес за новата изведба на АМГ ГТ 43 Купе вели дека тоа е „елегантно уживање во возење за пуристи“. Голем и престижен модел, со мотор од А и Ц-класа. Заден погон и 421 КС/500 њутнметри звучат повеќе од доволно добро, а два литри и четири цилиндри може и да се занемарат, ако се умее да се разбере како денес се одвиваат нештата во светот.

Доаѓањето на „основната“ изведба во гамата на АМГ ГТ е многу поголема работа, отколку впуштање во критика дека Афалтербах ете вградил „евтин“ мотор во скапиот автомобил. Тоа секако не е евтин мотор, туку е најсилниот и технички најспособен четирицилиндарец во историјата на светот. Доколку сето тоа резултира со цена што ќе биде 50.000 евра под топ-моделот ГТ 63 АМГ со неговите 200.000 евра, тогаш целата мисија е јасна.

АМГ спомнува „поволна распределба на тежината“ и „динамични возни својства“, упатувајќи кон компактниот и лесен мотор

Секако дека тоа не се „само 4 цилиндри“. Дволитарецот користи електричен турбополнач, што потекнува од Ф1 и се вградува во низа топ-модели на Мерцедес. Намерата е да се постгигне силно повлекување уште од најниски вртежи, додека класичниот турбо-компресор уште се нема разбудено. Напојувањето со струја е преку 48-волтната мрежа, во којашто е главен стартер-генераторот. АМГ 43 ГТ е благ хибрид.

Михаел Шибе, директор на АМГ, објаснува како Афалтербах гледа на новиот модел: „Тој јасно се распознава како ГТ, но значајно се разликува од останатите модели. Тој е наменет за клиентки и клиенти што го сакаат дизајнот и ставаат нагласок на елеганцијата, без да сакаат да се откажуваат од уживање и возна динамика.

Спринтот до темпо сто трае 4,6 секунди, крајната брзина е 280 км/ч. Толку од четирите цилиндри

Деветстепениот менувач со двојна спојка користи влажна спојка, место класичен претворач на вртежен момент, заради пониска тежина и помала инерција. Во програмите Спорт и Спорт+, менувачот изведува меѓугас, што внесува класична нота во сета оваа техно средина.

Задниот спојлер не отсуствува и дел е од сложената активна аеродинамика, што го подигнува спојлерот над 80 км/ч, заедно со други мерки. Спојлерот се мести под пет агли, зависно од условите на возење.

Како АМГ-модел, секако дека системот за сопирање не остава простор за резерва: Предните дискови имаат димензија 390 х 36 милиметри, со шестклипни сопирачки клешти, димензијата назад е 260 х 26 милиметри. Исто како и во деловите од суспензијата, така и во сопирачките се направени бројни чекори за тежината да се сведе на најмала можна мера.

Опција е управувана задна оска, исто како и приспособлива амортизација. Стандард е АМГ Динамик со програми Комфор, Спорт, Спорт+, Индивидуално и Лизгав пат, на коишто со доплата за Динамик Плус им се придружуваат програми за возење по тркачка патека.

ГТ 63 АМГ во салонот на Мак Аутостар

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Новиот Сузуки Свифт почнува во Германија од 18.900 евра

Херц го смени шефот што нарача сто илјади електрични автомобили Тесла