Mercedes штотуку започна со производство на плагин-хибридната изведба на A-Class. Моделот што во ознаката се разликува единствено по буквата „е“, со бензинец со 160 КС и електормотор со 102 КС, во македонскиот ценовник чини помалку од топ-дизелот A 220. Тоа е резултат од даночната привилегија за овој вид на погон.
Новиот данок за возила што стапи на сила на 1-ви јануари и требаше на возилата со ниска емисија на штетни гасови да им обезбеди одредена привилегија во поглед на даночното оптоварување, генерално воведе повеќе неред, отколку ред. За возилата со хибриден погон, како најпродавани во оваа категорија, сега се плаќа полниот данок, додека кај возилата со плагин-хибриден погон се плаќа половина од данокот. Електричните возила, пак, кои сé уште спаѓаат во повисоките ценовни категории, ослободени се од данокот за возила.
Во случај на Mercedes A-Class, тоа донесе неколку интересни релации кај плагин-хибридната изведба со ознака 250 e, која стартуваше со производство пред неколку денови во фабриката во Раштат. Новиот модел во понудата на марката со сребрената ѕвезда, достапен во изведба со пет врати и во класична лимузинска изведба, чини исто колку топ-бензинецот A 250, а помалку од топ-дизелот A 220d со неговите 190 КС и нов 8-степен менувач со двојна спојка.
Лимузинската изведба на A-Class чини 500 евра повеќе од изведбата со пет врати; Спринтот за помалку од седум секунди не укажува на автомобил што во штедливоста ги надминува сите
Конкретно, цената на плагин-хибридниот Mercedes A 250 e во Македонија изнесува 37.980 евра, бензинецот A 250 чини десет евра повеќе, додека за A 220 d треба да се издвојат 38.480 евра или 500 евра повеќе отколку за „е“, како што е ознаката на оваа погонска варијанта. Токму половичното ослободување од данокот за возила, прави 250 е со понапредната погонска техника да чини исто колку „класичниот“ А 250.
Електромоторот, литиум-јон батеријата, трансформаторската секција, специфичната и побогата опрема на плагин-хибридниот Mercedes A 250 e практично следуваат бесплатно, поради половичното даночно ослободување за плагин-хибридните возила
Моделите со плагин-хибриден погон се дел од стратешката цел на Mercedes, половина од продажбата на возила до 2030 година да отпаѓа на возила со електрифицирана или целосно електрична погонска спрега. Буквата „е“ во ознаката, сосем јасно се однесува на електриката, односно на EQ Power.
Хибридниот модул што се вградува во A-Class е мошне компактен. Електромоторот е вграден во самиот осумстепен менувач со двојна спојка. Првпат во Mercedes, моторот стартува со помош на електромотор, место со класичен стартер (анласер). Моќноста на електромоторот изнесува 75 киловати, односно 102 КС.
Со седумдесетина километри досег на струја, може комотно да се патува секој ден до работа со погон на струја и батеријата да се полни на два или три денови
Во комбинација со бензинскиот четирицилиндарец од 1,33 литар, со директно впрскување и турбонатполнење, се постигнува системска моќност од 218 КС и вртежен момент од 450 њутнметри. Благодарение на електромоторот, поаѓањето е моќно, но и возачкото искуство што следи потоа не е помалку импресивно. Стартот до темпо сто трае 6,6 секунди, крајната брзина изнесува 235 km/h.
За напојување на електромоторот служи литиум-јон батерија со капацитет од 15,6 киловатчасови. Како суштинска разлика на плагин-хибридниот погон, наспроти класичниот хибрид, батеријата може да се приклучи за полнење на обичен приклучок за струја, како и на полнач со наизменична или еднонасочна струја. Со полна батерија и во идеални услови, A 250 e може само со енергијата во батеријата да извози до 70 километри, пред да се вклучи бензинецот. Батеријата е од сопствена продукција и тежи 150 килограми, вклучувајќи систем за водено ладење. При користење ѕиден полнач со моќност од 7,4 kW, што се поставува на пример во гаража, полнењето трае 1 час и 45 минути (од 10 до 100%), додека на брз полнач, процедурата трае 25 минути (од 10 до 80% наполнетост).
Иако компоненти од хибридниот погон се сместени под подот, во багажникот на лимузинската изведба пак остануваат пристојни 345 литри
Постојат неколку конструкциски разлики со изведбите со обичен погон. Издувот не продолжува до опашот, туку завршува во средината на подот, а придушувачкиот лонец е сместен во средишниот тунел. Резервоарот е поместен до задната оска, со што е добиен простор за батеријата да се постави под задната клупа. Багажникот е смален незначително.
Како трета генерација на плагин-хибридниот погон на Mercedes, при заедничката работа на електромоторот и моторот се земаат превид и податоците од навигацијата, за свијоците што претстојат, за нагорнина или надолина и слично, со цел да се постигне најголемата можна заштеда.
Трите каросериски изведби со плагин хибриден погон во гамата на A-Class; Погонот наскоро ќе се вградува и во останатите изведби во гамата на компактниот модел
Возачот може директно на воланот да избира меѓу пет различни силини на степенот на рекуперација, односно на „моторното сопирање“. При спуштање или пуштање под залет, електромоторот работи како генератор и ја полни батеријата. Во одредени ситуации, возачот може да избере максимална рекуперација и воопшто да не ја користи педалата за сопирање.
Уште една привилегија на плагин-хибридниот A-Class е можноста климатизацијата преку мобилна апликација да се вклучи пред да се седне во возилото, за кабината да биде соодветно загреана или изладена. Mercedes посочува и на убедливиот капацитет за влечење приколка, конретно станува збор за 1.600 килограми. Наскоро стартува и производството на B-Class во изведбата 250 e, цената за овој модел во Македонија изнесува 40.990 евра. За лимузинската изведба A 250 e Sedan, цената е 38.490 евра.
Технички податоци · Mercedes-Benz A 250 e / A 250 e Sedan
A 250 e |
A 250 e Sedan |
|
Погонска единица |
Плагин-хибрид |
|
Гориво |
Бензин |
|
Цилиндри |
4 |
|
Напојување |
Директно впрскување |
|
Натполнење |
Турбо |
|
Вентили |
4 |
|
Зафатнина |
1332 ccm |
|
Моќност |
160 kW (218 КС) |
|
Вртежен момент |
450 Nm |
|
Погон |
Напред |
|
Пренос |
Менувач со двојна спојка, 8 степени |
|
ДИМЕНЗИИ [mm] |
||
Должина |
4419 |
4549 |
Ширина |
1796 |
1796 |
Висина |
1445 |
1446 |
Меѓуоскино растојание |
2729 |
2729 |
Круг на вртење |
11,0 m |
11,0 m |
Багажник |
310 / 1125 L |
345 L |
Празно возило |
1680 kg |
1700 kg |
Носивост |
475 kg |
475 kg |
Тежина на приколка |
1600 kg |
1600 kg |
ПЕРФОРМАНСИ |
||
0-100 km/h |
6,6 s |
6,3 s |
Крајна брзина |
235 km/h |
250 km/h |
Потрошувачка на гориво |
1,4 L/100 km |
1,4 L/100 km |
Досег на струја |
68 km |
69 km |
Емисија на СО2 |
33 g/km |
32 g/km |
Потрошувачка на гориво, просек според WLTP |
1,1 L/100 km |
1,1 L/100 km |
Потрошувачка на струја, шросек според WLTP |
17,7 kWh/100 km |
17,4 kWh/100 km |
Емисија на СО2 според WLTP |
25 g/km |
24 g/km |
Големина на батерија |
15,6 kWh |
15,6 kWh |
Времетраење на полнење |
На обичен приклучок (2,3 kW): 5,5 часови до 100% ; На ѕиден полнач (7,4 kW): 1,75 час до 80% ; На брз полнач (DC): 25 min до 80% |
|
Цена во Македонија (во евра) |
37.980 |
38.490 |
Хибридна тура со Toyota Corolla: Со 30 литри бензин низ цела Македонија (Дел 1)