Само најголемите автомобили во историјата ја имаат честа да бидат изработени во намален формат. Lada Niva досега отсуствуваше во понудата на големите фирми за модел-автомобили.
Lada Niva или по ново Lada 4×4, отсега може да се наоѓа и директно во дневниот салон или во канцеларијата. Навиката за работите што ни значат многу, да ги чуваме блиску до себе, доведе до тоа и рускиот теренски класичар да доживее модел-автомобил.
Производителот е Wiking, едно од најценетите имиња на сцената што и натаму опстојува во дигиталната ера. Несопирливиот теренец од Тољати е изработен во размер 1:87, кој е предизвик и можат да си го дозволат само најдобрите производители.
Смалената Lada Niva е изработена според годиштето 1994, во основната изведба и со каросерија во зелена боја. Колекционерите посебно ќе ги ценат деталите што ги има изведено Wiking. Во хаубата се забележуваат препознатливите рабови, страничните прозорци имаат рамки, па дури има и жлебови за собирање вода на покривот, капак на резервоарот и отвори за проветрување назад.
Деталноста на изработката е тоа што прави моделите на Wiking да бидат ценети меѓу колекционерите
Не недостигат ниту шарнирите на задниот капак. Предните светла се проѕирни, маската е со отвори. На предните седишта се забележуваат малите потпирачи за глава и поделената задна клупа. Во модел-автомобилот што е долг одвај пет сантиметри се изведени и инструментите во оригиналниот изглед, а воланот не е излеан заедно со таблата, туку е посебно вметнат.
Цената на страницата на производителот изнесува 14,99 евра. Производителот со долга традиција претставува нови модел-автомобили на секои два месеци. Lada Niva се очекува да биде достапна кон крајот на април.
