за

Спортската лимузина на Kia заминува со посебна серија од 1.000 примероци

Kia се збогува со својот гран-туризмо модел Stinger со специјална серија Tribute Edition, што е опремена врвно и изработена е најблагородно.

Stinger е моделот што за Kia го разви Алберт Бирман, некогашен главен техничар во BMW M GmbH. Тоа беше голема пресвртница за Kia, со којашто марката внесе врвна динамика во имиџот на своите модели. Дојде време Stinger да си замине, а наследникот веќе е тука, иако многумина не го препознаваат како таков. Тоа е EV6, електричниот кросовер, со 585 КС во GT-изведбата.

Завршната серија од Kia Stinger ќе се изработи во 1.000 примероци, именувана Stinger Tribute Edition. Како основа за моделот служи изведбата со 3,3-литарски твин-турбо V6, во врвното ниво на опременост GT. Посебност на серијата е каросеријата лакирана во аскот-зелена боја. Може да се избере и новата мат сива боја наречена „мунскејп“. На тоа доаѓаат уште ретровизори лакирани во сјајна црна боја, истата боја што ја носат и сопирачките клешти од Brembo и тркалата од 19 инчи.

Во внатрешноста се изведени бројни зафати во поглед на дизајнот и примената на материјали, за дополнително да се нагласи спортскиот амбиент. Спортските седишта се обложени со отмена кафена кожа, што се користи и на воланот и на вратите. Горниот дел од средишната конзола е облагороден со панел со изглед на карбон, на што се надоврзуваат и украсни елементи во истиот стил во вратите.

Амблем што симболизира оса – достојно на името Stinger – е втиснат во потпирачите за глава. Спортската лимузина го доби името по брзата реакција на 3,3-литарскиот V6. За еклузивноста на моделот сведочи серискиот број што е наведен во плочката на прагот на возачката врата. Тоа е знак дека станува збор за примерок од серијата што ќе се изработи во само 1.000 примероци и достапна е глобално.

New item by Automedia MK / Google Photos
New item by Automedia MK / Google Photos

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Што е рекуперација кај хибридните модели, објаснува „професор“ Mercedes

Opel Astra славенички ја извозе 160-та година на германската компанија