Honda по 40 години го враќа Dax во Европа

Возење во наједноставна и најчиста форма. Тоа го нуди Honda Dax, со пресувана челична рамка, предна вилушка од 31 mm, тркала од 12 инчи и воздушно ладен двовентилец со четиристепен менувач и центрифугална спојка. Тоа што Dax го нуди најмногу, тоа е забавата во возењето.

На овој мотоцикл на Honda најмногу ќе се радуваат возачите што се во своите средни години, кои можеби поседувале Dax во младоста. Во исто време, ретро-елементот ги привлекува и младите купувачи. Највпечатливиот елемент кај Honda Dax е рамката во форма на Т. Оттаму доаѓа и името на овој оригинален мотоцикл. Изгледот потсеќа на „dachshund“, нам познат како јазовичар.

Тајната е во едноставноста. Челичната рамка обезбедува цврстина и содржи резервоар за гориво, додека „превртената“ телескопска вилушка од 31 mm, двата амортизери назад и тркалата од 12 инчи со дебели гуми се грижат за лесно управување и добар комфор. Димензиите на Dax се мали, но има доволно простор за две лица да се возат. Назад има хромиран држач.

Моторот од 124 ccm, со моќност од 6,9 kW (9,4 КС) при 7.000/min е издржлив и штедлив, повлекува рамномерно и меко. Центрифугалната спојка префрлува меѓу четирите степени на пренос, без да има потреба од рачка на воланот. Возењето е едноставно, но и забавно со традиционалната педала лево, за менување на степените на пренос.

Сите светла се диодни, дисплејот е тркалезен. Honda Dax SТ125 ќе биде достапна во небула црвена и кадет сива боја, двете со бисерен ефект.

Технички податоци · Honda ST125 Dax