Учеството во мотоспортот е традиција во Goodyear. Кралската класа во трките со камиони во Европа отсега ќе се вози под предзнак на производителот на гуми. Серијата во новата сезона се води како Goodyear FIA ETRC.
Тоа што важи за автомобилите, важи и за камионите. Мотоспортот им нуди на производителите на камиони платформа за докажување на моќноста и издржливоста на возилата и на компонентите, за воведување револуционерни технологии, па и за најава на идните технологии за зачувување на животната средина.
Кралската класа во трките со камиони во Европа, FIA European Truck Racing Championship, во новата сезона го додава името Goodyear, како главен спонзор на првенството. Во осумте трки во претстојната сезона ќе се вози со гуми Goodyear по најпознатите и најпредизвикувачки тркачки патеки на континентот.
Од лани, камионите во FIA ETRC користат 100% HVO-биодизел од обновливи извори, заради заштита на животната средина. Камионите први почнаа да користат биогориво од обновливи извори во првенство што е под закрила на FIA. Кратенката HVO доаѓа од Hydrotreated Vegetable Oil, односно хидротретирано растително масло.
That sound though 👌🏻 #fiaetrc @buggyra_racing pic.twitter.com/Nhndqx44Pj
— Goodyear FIA ETRC (@FIA_ETRC) March 3, 2022
Goodyear ќе соработува со ETRA (European Truck Racing Association) за во следните години на сцената да се популаризираат производи што штедат гориво и се трошат малку. Интелигентните системи за контрола на притисокот во гумите на Goodyear, на трките во рамките на FIA ETRC се исто толку важни колку и во секојдневниот камионски транспорт, затоа што придонесуваат за продолжување на векот на користење на гумите и помагаат за времето на мирување на камионот во сервис да се сведе на најмала можна мера.
Станува збор за најуспешната марка гуми во историјата на Формула 1 и официјален добавувач за најпознатите шампионати ширум светот, вклучувајќи ги светското првенство во трки во издржливост WEC и Nascar. Вклучувањето на Goodyear како главен спонзор во кралската класа на камионските трки претставува само природно крунисување на традиционалното присуство на марката во мотоспортот.
Европското првенство во трки со камиони е прво првенство под закрила на FIA, што го носи името Goodyear во официјалниот назив.
Goodyear е официјален партнер за гуми и во останатите тркачки серии, во коишто ќе се користи биогориво: FIA World Endurance Championship (вклучувајќи 24 Часа Леман) и European Le Mans Series, како и основоположникот на електричниот FIA ETCR – eTouring Car World. Секој тим во „електричниот“ TCR користи посебна верзија на Goodyear Eagle F1 SuperSport, што е развиена специјално за електрични автомобили со високи перформанси.
