Hennessey Venom F5 е посилен и побрз од Bugatti Chiron, но и натаму е само Hennessey? Со над 1.600 КС и помалку од 30 секунди во дисциплината 0-400-0 km/h, американскиот хипермобил повторно има шанси да ја стекне толку посакуваната слава и да го засени нај-автомобилот Chiron. Единствен услов е силните ветувања да се исполнат.
Џон Хенеси го претстави долгонајавуваниот Hennessey Venom F5 на саемот за тјунинг во Лас Вегас. За разлика од претходникот, кој беше изработен врз основа на Lotus Exige, новакот е комплетно развиен од нула, со една цел – да биде најбрзиот автомобил во светот.
Основачот и шеф на компанијата, Џон Хенеси, верува дека F5 и по 25 години ќе поседува перформанси и дизајн што се недостижни за останатите. Болидот од Тексас е именуван според најразорното торнадо според скалата Фуџита. Уште е неизвесно дали Hennessey Venom F5 ќе стане првиот автомобил што постигнува над 300 милји на час (околу 483 km/h).
Еден од основните услови за тоа е твин-турбо V8 моторот да достигне моќност од преку 1.600 КС. Тимот уште работи на тоа. Импресивната моќност ќе се пренесува само на задната оска (!), преку седумстепен секвенцијален менувач. Со тежински оптимирана шасија и каросерија целосно изработена од карбон, F5 ќе тежи 1.350 килограми.
За забрзувањето се ветуваат помалку од 10 секунди до 300 km/h, што е побрзо од актуелните болиди во Формула 1. Дисциплината во којашто можат да се мерат само најсилните и најбрзите, 0-400-0 km/h, американскиот хиперавтомобил ќе ја совладува за помалку од 30 секунди.
Основната цена за Hennessey Venom F5 ќе изнесува 1,6 милион долари. Планирано е серијата да се изработи во само 24 примероци
Најавите и ветувањата на Hennessey за Venom F5 во секој случај ќе годат на продажбата на „класичните“ тјунирани автомобили од работилницата на Џон. На штандот на СЕМА се наоѓаат и VelociRaptor 6X6 и Exorcist, базиран врз Camaro ZL1.
