Групацијата GAZ важи како најголем производител на стопански возила во Русија, со широка гама од камиони, но и со автобуси што не заостануваат зад понудите од марките со позвучни имиња на сцената.
Групацијата GAZ, во чијшто состав влегува и марката автобуси LiAZ, неодамна испорача 110 автобуси за Челјабинск, град со 1,2 милион жители во централна Русија и седми најголем град во земјата. Тоа ќе беше обична вест, доколку не се работеше за автобуси што користат компримиран природен гас, односно CNG.
Автобусите се од моделот LiAZ-5292 CNG, кој се издвојува како еколошки модел. Набавката е дел од државниот проект за чист воздух наречен едноставно „Екологија“. Главната цел на проектот е да се намали загадувањето на воздухот во големите индустриски центри.
Фабриката за автобуси LiAZ се наоѓа во Ликино, град на околу 100 километри оддалеченост од Москва, и произведува автобуси уште од 1959 година. Возилата за Челјабинск користат мотор YaMZ-536 со погон на метан и ја исполнуваат нормата за животна средина Euro 5.
Од клучна важност е во автобускиот јавен превоз во големите градови да се користи погон на метан, поради значително почистата емисија, а воедно и ниската цена на горивото, што прави и билетот да биде поевтин
Компримираниот природен гас согорува хемиски, без ослободување чад, а содржината на штетни оксиди е четирипати пониска од максималното ниво што го дозволуваат стандардите за заштита на животната средина. Тоа е особено важно во големите градови. Покрај тоа, цената на гасот е значително пониска во споредба со дизелот, што понатаму го поевтинува и транспортот за граѓаните.
Автобусите располагат со капацитет за 108 патници, вклучувајќи 28 седишта и простор за лица со телесна попреченост. Конструкцијата е нископодна, за да се овозможи пристап со помошна количка се вградува механичка рампа и нема скалила во патничкиот простор. Дополнително е изведен и простор за пес водич за лица со оштетен вид.
За комфорот на патниците се грижат безжичен рутер, USB приклучоци за полнење, тапацирани седишта и климатизација. Електронски регулирано наведнување на каросеријата овозможува во автобусот да влезат сите категории патници, исто како и да се качи крупен багаж, велосипед, скутер, куфер итн.