Продавниците во Франција од летово ќе бидат обврзани да ги прикажат тестерите на посебно место, вклучувајќи тестови на хемиска основа и електронски тестови. Овие уреди мора да се наоѓаат веднаш покрај најголемата полица со алкохолни пијалоци или покрај касата.
Од онлајн-продавниците се бара да прикажат соодветен банер на страницата за потврда за нарачката, којшто ќе покажува дека продавницата нуди и тестови за алкохол.
Прекршувањето на обврската ќе се казнува со парична казна во висина меѓу 675 и 1.875 евра.
Франција во 2019 година започна национална програма за вградување уреди што оневозможуваат стартување на моторот доколку возачот е во алкохолизирана состојба – за возачи што повеќепати направиле прекршок и возеле со прекумерно присуство на алкохол во организмот. Во првите девет месеци од минатата година биле поставени околу 1.500 вакви уреди.
