за

Секој петти електричен автомобил во Европа е произведен во Кина

Една петина од продадените батериски електрични автомобили во Европа се произведени во кинеските фабрики.

Електричен Серес 3 снимен во Извор, во репортажата по течението на Треска

Најновата статистика го покажува обемот со којшто кинеските автомобили ја напаѓаат Европа. Во јануари и февруари, секој петти електричен автомобил продаден во Унијата, пристигнат е од фабрика во Кина.

Доколку се гледа во целина, вклучувајќи ги и моделите со класичен погон, односно со мотори со внатрешно согорување, силината со којашто кинеските производители го напаѓаат европскиот пазар сепак не е толку голема. Во тој случај, само четири проценти од новите автомобили што биле регистрирани во земјите во ЕУ во февруари, произведени се во Кина.

Уделот на кинеските марки изнесува 16 проценти

При анализата на податоците се покажува дека 44 проценти од автомобилите што во ЕУ се увезени од Кина, потекнуваат од марки од Западот – односно тоа се марките Тесла, Волво (дел од концернот Џили) и Дачиа. Понатаму, во увозот од Кина, 40 проценти се од марката МГ Моторс, што е дел од концернот САИЦ.

Кога ќе се повлече цртата, само 16 проценти од сите новорегистрирани автомобили во Европа, во јануари и февруари потекнуваат од кинески марки.

Познатиот аналитичар Фелипе Муњоз, од Јато Динамикс, цени дека е претерана загриженоста околу делот што кинеските марки го заземаат од европскиот пазар: „На кинеските марки им останува уште долг пат пред себе, пред да покријат значаен дел од европскиот пазар. И покрај напредокот, што тие го постигнаа во поглед на моќноста и достапноста, треба да мине време да зајакне имиџот на марките и да се промени мислењето што долго владее.“

Една петина од новорегистрираните електрични автомобили во февруари се произведени во Кина. Меѓу нив се и модели од Тесла, Дачиа и Волво.

Голем раст кај кинеските марки

Динамиката со којашто новите автомобили од Кина се пробиваат на европскиот пазар сепак е значајна. Во споредба со февруари лани, уделот што им припаѓа на автомобилите произведени во Кина, во вкупната продажба во Европа (ЕУ28), пораснал за 43 проценти.

За споредба, бројот на возила произведени во Германија, во истиот месец лани и годинава, пораснал за само осум проценти. Меѓу земјите производители што изгубиле од својот удел на пазарот, спаѓаат Кореја, Италија, Мароко и Романија.

Најпродаван електричен автомобил е Тесла Модел Ипсилон

Далеку најпродаван електричен автомобил во ЕУ28 во февруари повторно е Тесла Модел Ипсилон, со 19.940 возила, што претставува раст од осум проценти во споредба со истиот месец во 2023 година. Освежениот Модел 3 ја зголемил продажбата за дури 71 проценти, на 7.912 возила.

Втор најпродаван електричен автомобил е Пежо 208 (5.322 возила), веднаш по него е МГ 4 (5.231 возила). Најпродаван германски е-модел е БМВ и4 со 3.748 возила.

МГ во февруари беше и марка со најголем раст во продажбата во споредба со лани, со плус 106 проценти и 15.620 возила. Наспроти тоа, Фолксваген изгубил еден процент и има продадено 95.511 возила.

Најголем губитник е Форд со минус 17 проценти и продадени 34.621 возила.

Топ 50 Најпродавани модели во Европа (ЕУ28) во февруари 2024

1 DACIA SANDERO 20797
2 TESLA MODEL Y 19760
3 VOLKSWAGEN GOLF 19490
4 PEUGEOT 208 18476
5 CITROEN C3 17787
6 SKODA OCTAVIA 16587
7 TOYOTA YARIS CROSS 15760
8 RENAULT CLIO 15002
9 VOLKSWAGEN T-ROC 13975
10 PEUGEOT 2008 13900
11 DACIA DUSTER 13630
12 FIAT PANDA 12865
13 KIA SPORTAGE 12623
14 FIAT/ABARTH 500 12570
15 RENAULT CAPTUR 12083
16 OPEL/VAUXHALL CORSA 11959
17 TOYOTA YARIS 11895
18 FORD PUMA 11745
19 NISSAN QASHQAI 11436
20 HYUNDAI TUCSON 11174
21 TOYOTA COROLLA 10622
22 VOLKSWAGEN TIGUAN 9942
23 AUDI A3 9770
24 PEUGEOT 308 9755
25 VOLVO XC40 8962
26 VOLKSWAGEN T-CROSS 8788
27 FORD KUGA 8639
28 SKODA KAROQ 8466
29 BMW X1 8413
30 VOLKSWAGEN POLO 8407
31 TOYOTA C-HR 8254
32 SKODA FABIA 8060
33 SEAT/CUPRA LEON 7955
34 DACIA JOGGER 7936
35 TESLA MODEL 3 7822
36 MINI HATCH 7811
37 PEUGEO 3008 7579
38 CUPRA FORMENTOR 7559
39 TOYOTA AYGO 7462
40 VOLVO XC60 7316
41 SKODA KAMIQ 7257
42 OPEL/VAUXHALL MOKKA 7063
43 MG ZS 6800
44 BMW SERIES 3 6771
45 HYUNDAI KONA 6607
46 TOYOTA RAV4 6604
47 NISSAN JUKE 6566
48 OPEL/VAUXHALL ASTRA 6547
49 VOLKSWAGEN PASSAT 6488
50 BMW SERIES 1 6425

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Мерцедес разви гласовен асистент за кучиња

Сеат со историски резултати