Дарко Јаконов
При развојот на Ducati Diavel 1260 Lamborghini, италијанските мотоциклисти се ориентираа според суперспортскиот Lamborghini Sian FKP 37. Специјалниот мотоцикл ќе се изработи во десетпати поголема серија од ексклузивниот болид од Сант Агата, но тоа пак е далеку од масовна продукција – само 630 примероци.
Двете марки под покривот на Audi стапија во необична соработка. Ducati 1260 Lamborghini е лакиран во истата боја од ексклузивниот тркач на Lamborghini што се води како „Gea Green“. Покрај бојата, заеднички обележја се обемната примена на карбон и кованите тркала со дизајн по пример на Sian.
Шестаголната издувна цевка и мотивот Y на седиштето се во знак на Siàn FKP 37. Рамката, заштитата долу и тркалата се украсени со „Electrum Gold“. Препознатливата црвена боја за Ducati е користена за сопирачките клешти Brembo. Без работни течности, мотоциклот со моќност од 162 КС тежи само 220 килограми, што е резултат од примената на карбон.
Бројот 63 што се наоѓа на мотоциклот има посебно значење за производителот на автомобили од Сант Агата Болоњезе. Фирмата е основана во 1963 година. Во чест на годината се ориентира и серијата од 630 примероци од Diavel Lamborghini. Заедно со плочката со бројот на мотоциклот во серијата, клиентите можат да нарачаат и ексклузивен шлем со графика што е во стил со мотоциклот. При вклучување на контактот, на TFT-дисплејот се појавуваат логоата од двете марки, заедно со силуетата на мотоциклот.
Цената што ја наведува Ducati за овој Lamborghini на две тркала изнесува 34.325 евра.
>>> Ducati Multistrada V4 е прв мотоцикл со приспособлив темпомат
