Производителот на автомобилите и камионите Mercedes-Benz се откажува од својот пакет акции во Renault.
Вкупно 9,2 милиони акции, што пензиските фондови на Daimler ги поседуваа во францускиот производител Renault, понатаму ќе им бидат понудени на инвеститорите, од страна на Bank of America и BNP Paribas. Тоа е наведено во соопштението од Штутгарт, кое што беше испратено и до новинската агенција Блумберг.
Со пакетот акции, што соодветствува на три проценти удел во акциите на Renault, Daimler досега беше петти најголем сопственик на акции во францускиот производител. Renault до минатата пролет поседуваше удел во Daimler, но во март се откажа од 16 милиони акции во германскиот гигант.
Daimler и Renault во 2010 година меѓусебно си разменија удели во компаниите, со цел да се зајакне првично планираната индустриска соработка. Таа сепак не доведе до очекуваниот исход.
