за

Пет цилиндри и 390 КС за најсилната Cupra Formentor

Изведбата на брзиот кросовер Formentor со петцилиндарец од Audi и издувни цевки во заштитната бакарна боја на Cupra ќе се изработи во ограничена серија.

Cupra Formentor VZ5

Топ-изведбата на шпанскиот кросовер Cupra Formentor цели многу високо и погодува – со фамозниот петцилиндарец на Audi. Спортската марка што се издвои од Seat ќе го изработи автомобилот во само седум илјади примероци.

Моторот од Audi RS3 ќе работи во специјалната топ-изведба на Cupra Formentor. Моделот со дополнителна ознака VZ5 ќе се произведе во серија од седум илјади примероци, испораката е планирано да стартува кон крајот на годината. Цената секако дека ќе порасне уште малку над актуелната топ-изведба со дволитарски турбо-бензинец со 310 КС. Верзијата со екстра цилиндар на германскиот пазар ќе стартува малку под 60.000 евра. Тоа се’ уште е под цената на Audi RS Q3.

Во Audi не сакаа својот обожуван петцилиндарец да му го отстапат на Golf R, но затоа им се допадна моторот да се вградува во спортската марка на Seat, во Cupra. Моделот со ознака VZ5 располага со 2,5-литарски TSI со 390 КС и 480 њутнметри. Тоа се десет КС помалку од моќноста што уникатниот петцилиндарец ја постигнува во RS-изведбите во гамата компактни модели на Audi, односно во RS3, RS Q3 и во TT RS.

New photo by Automedia MK / Google Photos

Пред пресадувањето во Formentor, моторот доживеа неколку преправки во системот за ладење. Моќта се пренесува на сите тркала, за преносот е задолжен седумстепен DSG. Поради пониската тежина, меѓу другото, шпанскиот кросовер-болид спринтува до темпо сто за три десетинки покусо од RS Q3, односно за 4,2 секунди. Крајната брзина вообичаено е ограничена на 250 km/h. Високата моќност оди заедно со прогресивно управување и приспособливо подвозје.

Ознаката VZ5 потекнува од „veloz“, шпанскиот збор за брзина, за петката е јасно

Секако дека VZ5 како специјален модел има и посебни стилски белези. Меѓу главните знаци на распознавање се косо поставените издувни цевки, по две на секоја страна. Издувот е впечатлив и по бојата, со цевки со финиш во бакарна боја, заштитен знак на Cupra. Задниот браник исто е преработен и поседува нов дифузор изработен од карбон.

New photo by Automedia MK / Google Photos

Напред се забележуваат темните украсни делови околу маската и во браникот. Во долниот отвор за воздух е вградена решетка со спортски груб растер, заедно со поголем сплитер од карбон. Третманот на Formentor во Formentor VZ5 го заокружуваат подвозјето спуштено за десет милиметри, проширените крила и специјалните тркала од 20 инчи. Тајга-сивата боја од премиерата е ексклузивна за VZ5.

Спортски школкасти седишта секако дека не смее да отсусгвуваат. Ентериерот по желба може да биде изведен во црн микрофибер и кафена напа кожа. Украсните штепови се во бакарна боја.

New photo by Automedia MK / Google Photos

>>> Тест: Seat Leon 1.5 eTSI FR

Дарко Јаконов

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Avatar

Вашата адреса за е-пошта нема да биде објавена. Задолжителните полиња се означени со *

harley davidson pan america

Harley-Davidson отсега ќе дивее по теренот

Karma GS-6

Оваа електрична лимузина има добра Karma