BMW X3 покрај Скарлет Јохансон во холивудската „Црна вдовица“

Со новиот холивудски блокбастер „Црна вдовица“ ( Black Widow), BMW станува дел од кинематскиот свет на Марвел. Станува збор за акциски трилер, што премиерно ќе се прикаже на 9-ти јули.

Во најновиот филмски спектакл од студиото Марвел ќе го видиме и BMW X3 во клучна улога. Во неколку носечки сцени се појавува и Gran Coupe од серијата 2. На каналот на BMW на јутјуб може да се видат неколку ексклузивни сцени од снимањето на филмот.

Ова е првпат BMW да соработува со студиото Марвел. Тоа што BMW X3 и Gran Coupe од серијата 2 навистина имаат носечки улоги во филмот е резултат од новата стратегија на баварската марка. Автомобилите со сино белиот знак во новите реклами се поврзуваат со силен емотивен импулс. Од Минхен најавуваат дека соработката со Марвел ќе продолжи и по „Црната вдовица“.

Во BMW Welt, во центарот посветен на марката во Минхен, наскоро ќе биде поставена изложба со возилата користени при снимањето на филмот – со сите траги врз нив, вклучувајќи и дупки од куршум. Тоа ќе се совпадне со филмската премиера, што е закажана за 9-ти јули.