Новиот закон во Австрија е на сила само неколку денови, а неколку возачки екстремисти веќе останаа без својот автомобил.
Радар измерил брзина од 114 километри на час на 28-годишник во Виена. Полицијата: „Бидејќи е утврдено пречекорување на брзината за повеќе од 60 км/ч, во населено место, привремено е одземено патничкото возило.“
Австриската новинска агенција АПА јавува дека имало заплена на возило и во Тирол и Кернтен.
Од 1-ви март во алпската република важи: За пречекорување на брзината за повеќе од 60 км/ч во населено место и за 70 км/ч на отворен пат, можно е возилото да биде запленето. Тоа може да се случи доколку на возачот и претходно му е изречена казна за пребрзо возење.
Во случај дозволената брзина во населено место да се пречекори за повеќе од 80 км/ч, односно за преку 90 км/ч вон населено место, тој возач нема да добие втора шанса. Полициските службеници во таков случај веднаш го одземаат автомобилот. Потоа следи отуѓување, односно возилото оди на наддавање.
