Дарко Јаконов
Русија годинава ќе почне со производство на луксузните автомобили од марката Аурус, коишто ги користи Претседателот Владимир Путин, во поранешната фабрика на Тојота во Санкт Петерсбург. Големата најава доаѓа од заменик премиерот Денис Мантуров.
Аурус Сенат во дел се потпира на стилот на лимузините ЗИЛ од советската ера. Тоа е службениот претседателски автомобил, со којшто Путин пристигна на неговата инаугурација во Кремлин, во вторникот.
Путин во февруари му подари едно возило на севернокорејскиот лидер Ким Јонг Ун.
Изјавата на Мантуров ја пренесе руската државна агенција ТАСС. Заменик премиерот кажа дека намерата е производството во фабриката во Ст. Петерсбург да стартува пред завршетокот на годинава. Поранешната фабрика на Тојота веќе подолго време е предадена во сопственост на Аурус.
Тојота во март лани ѝ ја префрли сопственоста на фабриката на државната компанија НАМИ, којашто располага со главнински удел во акциите на марката Аурус.
Аурус Моторс во 2021 година почна да ги произведува своите автомобили во руски Татарстан, на оддалеченост од околу 1.000 километри од Москва.
Русија изнаоѓа начини да ги користи фабриките што останаа да мируваат, откако дел од светските производители се повлекоа од рускиот пазар. Тоа се случи по воведувањето санкции од Западот кон руската држава, откако Путин во февруари 2022 година испрати трупи во Украина.
Според руската агенција Аутостар, годинава на рускиот пазар се продадени 40 возила од марката Аурус.
