Audi добива нов шеф, поранешен менаџер во BMW

Маркус Дусман ќе стане нов извршен директор во Audi на 1-ви април 2020 година. Педесетгодишниот машински инженер пристига на местото на Брам Шот, кој ја презеде службата лани во јуни. Дусман има тридецениско искуство во браншата, а претходното работно место му беше директор за набавки во BMW. Шот заминува од концернот на крајот на март.

Претседателот на надзорниот одбор на Audi AG и шеф на концернот Volkswagen, др. Херберт Дис, коментира за директорската смена: „Како исклучителен инженер, Маркус Дусман целосно ќе се заложи во издигнувањето на големите потенцијали на марката Audi, а со тоа повторно ќе ја нагласи веродостојноста на слоганот ‘Напредок преку техниката’“.

Првиот човек во концернот воедно му се заблагодари на актуелниот директор Брам Шот: „Тој го презеде раководството со Audi AG во тежок период, успешно го водеше бизнисот и направи важни промени. За тоа му се заблагодаруавам посебно.“

Меѓу главните смерници на новата стратегија на Audi спаѓаат забрзаната трансформација во понудувач на одржлива мобилност и решително намалување на емисијата на СО2 на компанијата.