Луксузни електрични ванови досега нудат само Кинезите, Швеѓаните – и Мерцедес-Бенц. Во делот од пазарот каде што и досега владееше В-Класата на Германците, се вмешува целосно електричен модел ВЛЕ, врз платформа што дава уште повеќе комфор, технологија, а со тоа и луксуз. Производството е во Виторија, Шпанија.
Со голема свеченост, на 12-ти јуни беше одбележан почетокот на производството на Мерцедес-Бенц ВЛЕ, во фабриката во Виторија, втора најголема фабрика на групацијата во светот. Покрај извршниот директор Ола Калениус, главен збор на настанот имаа Жорди Ереу, министер за индустрија и туризам на Шпанија, и Иманол Прадалес, премиер на самостојната заедница Баскија.
Групацијата Мерцедес-Бенц во изминатиот период вложи многу во шпанската фабрика, коајшто со тоа се вбројува меѓу најголемите индустриски проекти на Мерцедес-Бенц Ванс во Европа.
ВЛЕ е воедно почеток на ново поглавје за вановите на марката. Основа за возилото е платформата ВАН.ЕА, којашто е наменета исклучиво за електрични возила, внесува нова технологија и врз истата ќе се изведуваат повеќе модели.
Мерцедес-Бенц Ванс најави дека целата понуда од ванови, вклучувајќи и доставни изведби, и луксузни возила, наменети за скапи хотели и престижни настани. Освен во Шпанија, ВЛЕ ќе се произведува и во Кина за локалниот пазар. Фабриката во Фуџоу се приклучува кон завршетокот на годината.
Светот првпат го виде новиот модел во март. Според производителот, ВЛЕ соединува два света. Едниот е светот на лимузините, од каде што ванот ги презема возната динамика и возниот комфор, додека од светот на повеќенаменските возила, односно МПВ, ја презема приспособливоста, просторноста и сестраноста.
Со електромотор од 203 киловати, односно 276 КС, ВЛЕ 300 постигнува досег до 713 километри
Напредната технологија што се базира врз 800-волтна мрежа, овозможува ниска потрошувачка и брзо полнење, што на ванот му отвора широк пазар. Главните рекламни аргументи му се простор за најмногу 8 лица и досег од преку 700 километри.
Важна улога има и сопствениот оперативен систем МБ.ОС, „андроидот“ на Мерцедес-Бенц. Тој има удел и во системите за асистенција, и во инфо-забавните функции, па дури и во перформансите.
На конфигураторот на Мерцедес-Бенц за Германија, ВЛЕ се нуди како сосем нова категорија на возила, односно Гранд Лимузина, стартувајќи од 82.259,70 евра, односно 69.125,80 евра без ДДВ, за изведба со 5 седишта. Врвниот модел е Ексклузив, со седум седишта и цена од 107.431,24 евра.
