Автомобилите со целосно електричен погон учествувале со близу 82 проценти во вкупната продажба на данскиот пазар во минатиот месец. Од вкупно продадени 11.934 нови автомобили, дури 9.737 возат чисто на струја.
Продажбата во Данска е на пат да ја задржи силната динамика и високиот удел од преку 80 проценти во текот на целата година. Електричните автомобили лани учествувале со 68,5 проценти во вкупниот дански пазар.
Побарувачката е посебно висока меѓу приватните купувачи. Електричните автомобили во приватна сопственост учествувале со 94,4 проценти во вкупната продажба во овој пазарен сегмент во февруари, не сметајќи ги службените ЕВ.
Експертите во земјата предвидуваат дека ќе се задржи високото ниво на електрификација на автомобилскиот пазар. Од некогашен мал пазарен сегмент, ЕВ прераснаа во прв избор на возачките и возачите во нордиската земја.
Постои причина зошто возачите се решаваат за електричниот погон, и секако дека таа е од финансиска природа. При купување електричен автомобил во Данска, се плаќа смалена стапка на данокот при регистрирање возило. Според првичните намери, повластувањето за ЕВ требаше да заврши во 2025 година, но властите решија да продолжат со поттикот и во 2026 година.
Данска е земја што наплаќа еден од највисоките даноци при прва регистрација на возило во светски рамки. На пример, за возило што чини 300.000 дански круни, односно околу 40.000 евра, следи данок за регистрација во висина од 256.000 круни. Кога на тоа ќе се додаде и ДДВ во висина од 25 проценти, крајната цена на возилото, место 40.000 евра, достигнува близу 700.000 круни, односно околу 93.000 евра.
Електричните возила се ослободени од овој данок, до одредена вредност на возилото. За електричен автомобил што пред даночење чини 40.000 евра, не се наплаќа данокот при регистрација. Единствено се додава ДДВ, така што цената на возилото на крајот достигнува 375.000 круни, односно околу 50.000 евра.
Колку чини полнењето електричен автомобил, пример Донгфенг Бокс?
Со високиот удел на ЕВ, Данска се приближува до шампионската Норвешка. Во февруари, ЕВ учествувале со 98 проценти во вкупната продажба во скандинавската земја. Норвешка веќе со години предводи во електрификацијата во светски рамки.
