Кинески Haval стана втора најпродавана марка во Русија по Lada

Продажбата на автомобили во Русија во првиот месец од 2023 година е намалена за 63,1 проценти во споредба со лани. Во јануари се продадени 32.499 патнички автомобили и доставни возила. Lada е прва, Haval е втора најпродавана марка.

Домашната Lada останува неприкосновен водач на рускиот автомобилски пазар во јануари, со 17.468 продадени возила, што е за три проценти под резултатот во првиот месец лани. Големото изненадување, коешто познавачите патем го најавија веднаш по откажувањето на западноевропските марки, следи веднаш на второто место.

Втора најпродавана марка во Русија е кинеската Haval, позната одлично и на македонскиот пазар, главно по својата серија СУВ-модели H6 и по новиот Jolion. Марката што е дел од концернот Great Wall Motor, во јануари продала 4.535 возила, постигнувајќи раст од 43 проценти во споредба со лани. Најпродаван модел од марката е Jolion, на 4-то место со 1.523 примероци. Само две места понатаму, следат луксузните модели F7, F7X и H9.

Уште една голема марка од Кина е високо на листата на најпродавани марки во Русија. Geely e на третото место, со 3.501 возило и со раст од дури 88 проценти. Топ-модел е Geely Coolray, на третото место. Најголемиот раст сепак го постигнува матичната марка на Great Wall Motor, со своите пикапи, којашто речиси четирикратно го зголемила својот пазар и во јануари продала 278 возила (+371%). Продажбата е далеку од првите три марки, меѓутоа трендот на пикапите и доставните возила на Great Wall Motor е по стрмна нагорна линија кон врвот.

Kia е прва марка надвор од руско-кинескиот сојуз, на петтото место со 1.415 возила и пад од 89 проценти. Не изненадува тоа што Sportage и таму е топ-модел на марката, со 336 продадени примероци во јануари. Во споредба со лани, сепак е голем падот, од 868 возила.

Haval има сопствено производство на возила во Русија, во јануари од производствените ленти се симна 100.000-от автомобил

Причините за големиот пад во продажбата на марките од „западот“ секако дека лежи во санкциите, односно во масовното повлекување на марките од големиот и благодарен пазар, каде што странските марки обично продаваа повеќе од поскапите, отколку од подостапните модели. Lexus, на пример, беше омилена марка на богатите, пред санкциите. Mercedes S-Class веќе по традиција е повеќе застапен по глава на жител во Москва, отколку во било која друга метропола или регион во светот.

Местото на традиционалните производители без проблем го зафаќаат кинеските марки. Наскоро стартува и локалната монтажа на СУВ-моделите на JAC, под возобновената марка Moskvich. Тоа ќе додаде извесен волумен во продажбата на рускиот пазар.

Најпродавани марки во Русија во јануари 2023

Најпродавани модели на патнички автомобили во Русија во јануари 2023 година