Fiat 500 е една од вечните ѕвезди на автомобилската сцена. Во јуни, италијанското автомобилче за секого и за секаде беше четврти најпродаван модел во Европа. Не е проблем ниту електрификацијата, затоа што Торино уште одамна го понуди Nuova 500, односно 500е. Еден летно брзински преглед на приборот и додатоците за моделот.
Јонизатор на воздухот во кабината на автомобилот. Тоа е вистинскиот луксуз, што обично е достапен во Lexus или во S-Class. Но, во тој луксуз можат да уживаат и возачките и возачите на Fiat 500e, односно Fiat Nuova 500 на некои пазари. Торино уште пред многу години го понуди јонизаторот како прибор и пријатно изненадување е тоа што оваа несомнено корисна и здрава ставка од приборот остана во понуда. Станува збор за мала туба што се сместува во држачот за чаша во средишната конзола, со ефектно осветлен прстен озгора. Функцијата е позната, главното е да се отстранат најситните честички нечистотија во воздухот. Тубата е преносна и може да се понесе со себе во домот, во канцеларија, каде било.
Менаџерите очигледно препознале дека на возачите на електричен автомобил им е посебно важно, воздухот да им биде чист и мирисен. Покрај јонизаторот, во понудата од прибор на Fiat има и ставка што се води како хигиенски пакет D-Fence. Со овој пакет се постигнува, преку самата вентилација на кабината да се пречистуваат над 95% од алергените и честичките PM од надворешниот воздух. Во состав на пакетот влегува и пречистувач на воздухот, како и UV-C чистач, што помага да се одржува хигиената на површините.
Секако дека можностите за посебно стилизирање се тоа што клиентите прво го очекуваат во ставките од приборот и додатоците. Одличен пример е пакетот Brass, со којшто капите на ретровизорите, предното и задното лого, клучот, добиваат површински изглед на месинг. Оваа стара легура од цинк и бакар му дава историски печат на Fiat 500. Во пакет доаѓаат и налепници во истиот стил, вклучувајќи и облога за покривот.
Каде што има Brass, мора да има и Chrome. Тоа е вториот пакет со иста содржина како претходниот, со таа разлика што се добива површина со изглед на хром. Бидејќи хромот повеќе се поврзува со престиж, пакетот содржи и хромирана лајсна за хаубата, странични хромирани лајсни, па и тркала од 16 инчи со хром-финиш.
Третата варијанта на овој стилски пакет се води како Iconic. Екстра ставки во овој пакет што внесува мат сива боја во Fiat 500 се ексклузивните налепници за покривот, задниот поклопец и страничните прагови. Тркала со мат-сив финиш од 16 или 17 инчи го заокружуваат овој пакет што става спортски нагласок.
Покривот може и целосно да биде испишан со името Fiat, а секако дека не смее да изостане варијанта со надолжна лента во италијанскиот триколор. Стилот зафаќа и во патосниците. Тие се нудат во премиум-изведба, изработени од Econyl, техно-материјал што се добива преку рециклирање.
Вистински стил е кога Fiat Nuova 500 ќе се паркира каде што е место за паркирање и од багажникот ќе се извлече електричен скутер, за достоинствено да се продолжи патот до одредиштето. Тротинетот се води како 500 Iride, носи дизајн на Nuova 500, има тркала од 19 инчи и со полна батерија обезбедува превоз до 30 километри, со брзина до 25 km/h. Полнењето трае 4,5 часови. Цената во Италија изнесува околу 700 евра.
Што сé има Fiat во својата понуда од прибор и додатоци, од програмата на специјалното одделение Mopar, може да се погледне на италијанската вебстраница https://www.fiat.it/mopar , а секако дека за сите информации се најупатени во Аутомобиле СК.
