Подружницата на Mercedes-Benz во Минхен целосно ќе се обнови и ќе добие современ изглед. Зафатот се планира да заврши до крајот на следната година. Објектот на Арнулфштрасе што и досега беше мошне впечатлив, во новата архитектура ќе го „вклучува“ и електричниот погон.
Нов изглед, но и нови функции за „стратешкиот“ центар на Mercedes во Минхен, во градот на главниот конкурент BMW. При влегување во сервисната работилница, возачките и возачите на Mercedes во иднина ќе се скенираат (поточно ќе се скенираат табличките), за на тој начин да се овозможи сервисниот советник веднаш да понуди соодветно сервисирање или услуга.
Градежните зафати веќе започнаа, но тоа нема да влијае врз функционирањето на објектот. Директорот на минхенската подружница Улрих Ковалевски: „Естетиката на модерниот луксуз и фасцинантните настапи на Mercedes-Benz и на нашата електрична марка Mercedes-EQ во иднина ќе се доживуваат на нов начин на Арнулфштрасе. Планираме поголемите подрачја да бидат подготвени веќе за време на ИАА во Минхен во септември.“
Салонот ќе прерасне во место за средби и доживувања, преку комбинирање на личен контакт и дигитални елементи во делот на советувањето, продажбата и сервисирањето. Посебен нагласок ќе биде ставен на електричниот погон. Во новиот салон ќе се прикажат сите модели, услуги и можности на новата марка Mercedes-EQ.
На изложбена површина од 19.000 метри квадратни, на четирите катови ќе се прикажуваат моделите на марките Mercedes-Benz, Mercedes-AMG, Mercedes-Maybach, Mercedes-EQ, smart и Mercedes-Benz Vans, како и MB Rent. Вкупно до 500 возила! Вработените во салонот ќе носат преносни уреди со себе и ќе можат во секое време и на секое место да им понудат соодветна услуга на клиентите.
