Во октомври, Renault Zoe се искачи до 7-то место меѓу десетте најпродавани модели на германскиот пазар, кој долго важеше како еден од најцврстите бастиони на дизел моторот.
Бидејќи германскиот принцип на работа се применува и во статистиката, истата ги двои продажбите на автомобили на приватни и службени. Доколку се исклучат автомобилите продадени за службени цели, тогаш Renault Zoe е дури на второто место на најпродавани модели на најголемиот автомобилски пазар во Европа. Моделот на првото место, дури и не мора да се спомнува – Golf.
Шампионскиот електричен автомобил со големина на Clio, во октомври се продаде во 5.014 примероци во Германија. Тоа е првпат во седумте години по почетокот на продажбата, Renault Zoe да се продаде во повеќе од 5.000 примероци на месечно ниво. Францускиот автомобил постави и рекорд за месечна продажба на електричен модел на германскиот пазар.
