Дилерската мрежа на Renault во Швајцарија дава на располагање 100 електрични возила Zoe за хуманитарните организации Каритас, Црвен Крст и Спитекс. Возилата ќе се користат за превоз на лица и за достава на лекарства и намирници.
Швајцарската организација на марката Renault обезбеди 100 примероци од електричниот Zoe, коишто без надомест и моментно им стојат на располагање на хуманитарците на Каритас, Црвен Крст и Спитекс. Локалните организации ќе можат преку посебна интернет страница да достават барање до мрежата на Renault и да остават податоци за контакт.
Барањето веднаш се проверува во еден од осумте центри на француската марка во земјата и возилото се става на располагање кај најблискиот дилер. Акцијата првично ќе трае до 24-ти април, но е можно и продолжување.
„Небирократското отстапување на 100 возила Renault Zoe ќе им помогне на организациите и на многубројните доброволци, да излезат во пресрет на дополнителните повици, набавките за постарите лица или за нивен безбеден транспорт. Zoe со досегот од 300 километри може со сигурност да ги исполни сите неопходни ангажмани во текот на денот, без штетна емисија“ изјави Клод Грегорини, оперативен директор на Renault во Швајцарија.
