Polestar 1, електричниот автомобил од подмарката на Volvo, првото возење пред публика ќе го има на Фестивалот на брзината во Гудвуд
Традиционалниот Фестивал на брзината во Гудвуд е местото кадешто публиката за првпат ќе го види Polestar 1 во движење. Престижното купе од подмарката на Volvo што е специјализирана за електричен погон ќе вози на ридската патека во Англија во средината на јули.
Во последниве години, во Гудвуд дебитираа важни автомобилски новитети, особено откако производителите почнаа да ги напуштаат класичните салони. Зад воланот на престижното купе ќе биде главниот тест возач на Polestar, Јоаким Ридхолм. На патеката што се наоѓа на приватниот имот на Лорд Марч ќе вози четвртиот тест-прототип од „единицата“ на Polestar.
Во меѓувреме се вршат завршни тестирања и дотерувања со останатите прототипи на неколку локации низ светот. Првите примероци од моделот што доби комплетно нова фабрика во Кина ќе бидат испорачани во средината на следната година.
