Дарко Јаконов
Во осмата генерација на Volkswagen Golf уште важи правилото дека е наменет за сите и за секаде, особено кога е под предзнакот на спортското возење. Класичарот Golf GTI, економистот GTD и екологистот GTE заедно ќе ја одбележат својата светска премиера на салонот во Женева.
Volkswagen ги најавува Golf GTI, GTD и GTE за салонот во Женева (од 5-ти до 15-ти март), каде што ова брзинско тројство заедно ќе ја одбележи својата светска премиера. Историјата ја започна Golf GTI пред 44 години, потоа во 1982 година следеше неговиот дизел-пандан GTD, за пред шест години, овој култ да се пренесе и меѓу плагин хибридите.
Волфсбург се фали дека карактерот на Golf GTI останал непроменет низ овие пет неполни децении, но од друга страна, култот на овој модел постојано се надградуваше преку најразлични моделски варијации, почнувајќи од G60 Syncro и Rallye, преку R, до екстремните преработки на тјунинг сцената.
Новиот GTI користи дволитарски TSI со 245 КС и максимален вртежен момент од 370 њутнметри. Како опција за шестстепениот мануелен менувач стои DSG со седум степени. Не е случајност тоа што и плагин хибридната изведба GTE ја постигнува истата системска моќност, преку комбинацијата од 1,4-литарски TSI, електромотор со 115 КС и шестстепен DSG. Системскиот вртежен момент тука достигнува 400 њутнметри.
Кој ќе победи во продажната трка меѓу трите спортски изведби на Golf: GTI, GTD или сепак е време да презеде плагин хибридниот GTE
Главното прашање сепак е околу досегот. Тој е продолжен благодарение на новата литиум-јон батерија и изнесува 60 километри. Батеријата е за 50% поголема во споредба со претходникот, со 13 kWh. Само со погон од електромоторот, Golf GTE може да постигне 130 km/h.
Во дизел-репрезентативецот Golf GTD работи дволитарски TDI со 200 КС и 400 њутнметри. Заради натамошно органичување на емисијата на азотни оксиди, овој дизел користи два сериски поврзани катализатори SCR (Selective Catalytic Reduction = селективна каталитичка редукција). Дизелот во триото стандардно вози со седумстепен менувач со двојка спојка.
Диодните предни светла се стандард. Исто како што црвената лајсна во маската е традиционално обележје на GTI, така лајсната е во сина боја кај GTE и во сребрена боја кај GTD. Две диодни лајсни по целата ширина ја нагласуваат оваа линија. На тој начин се создава препознатливост во појавата на секој модел во триото. Моќно изгледа и големата решетка на долниот отвор за воздух, со крупен растер и шема на саќе.
Спортскиот волан располага со сензорски полиња за ракување со функциите. Трите сребрени краци остануваат, со посебен печат кај секоја моделска изведба: Средишниот крак кај GTI е облагороден со црвена површина, односно е во сина боја кај GTE и сребрен во GTD. Останува и традиционалната каро-мустра на седиштата. Дизајнот е видоизменет и се нарекува Scalepaper – повторно во познатата шема: Штепот и шарата во мустрата се во црвена воја во GTI, во сина во GTE и во сребрена боја во GTD.
