Зголемената побарувачка на европскиот и на јапонскиот пазар придонесоа Тојота по половина година повторно да бележи раст во продажбата на своите автомобили.
Продажбата на Тојота повторно е во раст, за првпат по шест месеци, откако европскиот и јапонскиот пазар покажаа зголемена побарувачка за автомобилите на компанијата, иако сервисните повици во САД го попречија целосното заздравување на гигантот.
Светската продажба на корпорацијата Тојота, заедно со марката Даихацу и со марката товарни возила Хино, во јули се зголеми за 0,7 процент, на 924.918 возила. Тоа е прв раст по пет месеци во постојано намалување на продажбата, соопшти Тојота Сити.
Продукцијата во сите фабрики на Тојота во светот се зголеми за 0,6 процент, на 923.658 возила.
Наспроти силната побарувачка во некои азиски држави, посебно за СУВ моделите во Индија, јулската продажба трпеше поради сервисните повици во САД, за Гранд Хајлендер и за Лексус Т Икс.
Новиот миниван Гранвиа, што Тојота го произведува во Кина, наиде на силна побарувачка во земјата, но исто како и сите светски производители на автомобили, компанијата таму се соочува со силна конкуренција од домашните производители.
Прогнозите за тековниот месец не изгледаат најсјајно, откако тајфунот Шаншан ги затвори сите фабрики на Тојота во Јапонија, а дополнително и неколку фабрики на Даихацу. Тоа е уште еден голем удар врз компанијата којашто веќе се соочува со бројни потешкотии на домашниот пазар.
Тојота во септември се соочуваше со последиците од неколку скандали со возилата од своите подмарки, главно Даихацу, за неодамна во јуни да се случи и скандал со возилата од матичната марка.
Во минатиот месец, компанијата првпат во својата историја мораше по налог на владата да изврши корекции во хомологациите на неколку свои модели, поради што запреа испораките.
[the_ad id=”73735″]
Државниот канал НХК во почетокот на минатиот месец објави дека Тојота ги коригирала прогнозите за вкупната продажба за годинава, од првично 10,3 милиони на 9,8 милиони возила, како последица од скандалите.
Продажбата на конкурентот Хонда во јули се смали за 4 проценти, со продадени 302.625 возила. На силната побарувачка за хибридите на Хонда во САД им парираше падот од преку 40 проценти во испораките на возила во Кина, соопшти компанијата.
Продукцијата на Хонда во јули се зголеми за 5 проценти.
Глобалната продажба и продукцијата на Нисан се смалија за 1,3 процент, односно за 12,5 проценти, соодветно, објави компанијата.
