Дарко Јаконов
Кога станува збор за автомобилите со мотор со внатрешно согирување, корисниците најчесто ги пребаруваат германските марки. Кај електричните автомобили, трката ја предводи друг. Tesla сите ги остава во сенка.
Tesla повторно е во предност наспроти традиционалните производители. Во европски рамки, електричниот автомобил што корисниците го пребаруваат на онлајн-берзите најчесто е Tesla Model S. Калифорниската луксузна лимузина со погон на струја е на врвот на најпребарувани модели во речиси сите држави во Европа во коишто е присутна онлајн-берзата Autoscout24. Останатите места им припаѓаат на Renault Zoe, BMW i3, како и на Tesla Model 3 и Audi e-tron.
Гледано по држави, овие модели се најчесто на првите места на најпребарувани електрични автомобили. Исклучок е Германија, каде што петтото место му припаѓа на Volkswagen e-Golf, пред Audi e-tron.
Во Франција, првото место сосем очекувано му припаѓа на Renault Zoe. Во францускиот Топ 5 следат дури три модели на Tesla: Model S, Model 3 и Model X. Единствен модел што се вмешува во оваа доминација е BMW i3 на третото место.
Додека германските автомобили поретко се појавуваат во Топ 5 во категорија на возила со електричен погон, ситуацијата се менува драстично кога се пребарува за автомобил со обичен мотор. Во тој случај, во европски рамки предводи VW Golf (со 3,78 проценти од вкупниот број пребарувања). По класичарот следат серијата 3 на BMW (3,14 проценти), Mercedes C-Class (2,55 проценти), X-моделите на BMW (2,47 проценти) и Mercedes E-Class (2,19 проценти).
Традиционалниот бестселер од Волфсбург е модел за којшто на онлајн-берзите се пребарува најчесто. Исклучок и тука е Франција, но има и изненадување. Прв е Ford Mustang, со 2,79 проценти од вкупниот број пребарувања. Golf е втор со 2,32 проценти.
Просечните цени на европските Топ 5 модели се менуваа во различна насока. Додека серијата 3 на BMW (+5,22 проценти и просечна цена од 17.589 евра) и VW Golf (+4,04 проценти и просечна цена од 16.422 евра) поскапеа, Mercedes C-Class (-1,43 проценти и цена од 24.780 евра) и Mercedes E-Class (-2,63 проценти и цена од 27.073 евра) станале малку подостапни за европските купувачи.
>>> Пратките во Холандија се разнесуваат со електрични камиони
