Огранокот на Suzuki Motor во Тајланд има голем удел во успешниот бизнис на јапонската корпорација со вонбродски мотори. Фабриката на Thai Suzuki Motor произведе еден милион погонски единици.
Славеничкиот вонбродски мотор од Тајланд е Suzuki DF30A во класична црна боја што се води како „Nebular Black“. Огранокот на корпорацијата Suzuki Motor има фабрика во Патум Тани, во областа Танијабури, блиску до престолнината Бангкок.
Фабриката го постигна историскиот успех по 21 година и еден месец од почетокот на производството на вонбродски мотори во Thai Suzuki Motor во 1999 година. Врската на Тајланд со јапонскиот производител датира од многу поодамна, уште од 1968 година, кога Suzuki ја отвори фабриката како свој прв производствен погон надвор од Јапонија. Тогашната стратегија на корпорацијата Suzuki беше големиот локален пазар да се снабдува со мотоцикли.
Производството на мотоцикли во Thai Suzuki и денес се одвива под полна пареа. Дополнително се произведуваат 17 модели на вонбродски мотори. Пет од овие мотори се двотактни, со моќност меѓу 9,9 и 40 КС, додека 12 се четиритактни, со дијапазон на моќност меѓу 2 и 30 КС. Овие вонбродски мотори се испорачуваат на целиот светски пазар, вклучувајќи ја и Јапонија.
Во периодот до крајот на септември, корпорацијата ја зголемила продажбата на вонбродски мотори за 9 проценти во споредба со истиот период лани. Посебно е зголемен интересот за моделите со средна и висока моќност (четиритактни мотори од 40 до 350 КС), кои излегуваат од фабриката во Косаи. Нивната продажба пораснала за 12 проценти.