По слабиот почеток на годината, Тесла повторно се јави и во март го освои врвот на европскиот автомобилски пазар. Откако електричниот СУВ од средна класа во јануари заврши на 42-то место и потоа се поправи на 14-то место во февруари, првпат по декември 2025 година му успеа да понесе победа на месечно ниво.
Со скокот на врвот, Модел Уај го прекина двомесечниот победнички поход на Рено Клио. Тоа е уште еден доказ дека на европскиот пазар се случуваат големи промени.
Според податоците за продажбата во ЕУ, Велика Британија и ЕФТА, Тесла во март продала 33.723 примероци од Модел Уај. Тоа е скок од 117 проценти во споредба со истиот месец лани.
Класичните бестселери и натаму се силни
Зад Модел Уај следат Нисан Кашкај со 27.832 возила, пред Рено Клио со 24.294 возила. Дачиа Сандеро, најпродаваниот автомобил во 2025 година, во март се продаде во 22.788 примероци, додека Фолксваген Голф со 22.110 возила ја заокружи водечката петорка.
Добро напредуваше и Тесла Модел 3, којашто со 18.880 возила во март и со раст од 55 проценти се најде на 11-то место. Во февруари, електричната лимузина беше на 44-то место, а во јануари целосно исчезна од Топ 50.
Новите модели носат раздвиженост
Дополнителната динамика ја донесоа пред сé новите модели, а посебно во сегментот на СУВ и на кросоверите. Ситроен Ц3 Еркрос повеќе од десетпати ја зголеми продажбата и дојде до 12.365 возила, додека електричната Шкода Елрок напредуваше 146 проценти и достигна 11.439 продажби.
Опел Фронтера исто така се проби во Топ 50, со раст од близу 3.000 проценти во споредба со лани, кога моделот штотуку стартуваше со продажба.
Докажаните модели се под притисок
Во исто време, неколку докажани модели губат тло. Пежо 208 загуби 28 проценти и дојде до 18.258 возила. Кинескиот МГ ЗС падна 21 проценти, Нисан Џук имаше 19 проценти минус, додека Форд Куга со пад од 20 проценти дополнително ја ослабна некогаш силната марка. Под резултатот од лани беа и Фолксваген Тигуан, со 9 проценти во минус, и Рено Каптур, со пад од 11 проценти.
Билансот за првото тромесечје сепак покажува стабилност
За периодот од јануари до март, сепак се добива постабилна слика. Рено Клио води со продадени 55.763 возила, пред Тесла Модел Уај со 51.468 возила. Третото место му припаѓа на ФВ Голф со 50.782 возила. Следат Нисан Кашкај и Фолксваген Т-Рок.
Тромесечните бројки покажуваат дека силниот март не беше доволен, за Тесла да го презеде водството. Клио профитираше од несменетата динамика на продажба во текот на целото тромесечје.
Европскиот пазар и натаму го градат моделите со силна продажба, како Тојота Јарис Крос, Дачиа Сандеро, Фолксваген Тигуан или Пежо 208, коишто и покрај одредени падови во продажбата, се задржаа во Топ 10.
Новите модели носат раст
Најголемата раздвиженост во првото тромесечје сепак ја дадоа новите или неодамна стартувани модели. Шкода Елрок со плус 314 проценти достигна 28.279 продажби. Моделите како Ситроен Ц3 Еркрос, Фиат Гранде Панда и Дачиа Бигстер, имаа голем скок, иако нивната продажба во истиот период лани беше релативно ниска.
Меѓу големите добитници секако не смеат да недостигаат кинеските производители, посебно БИД, чијшто Сил Ју напредуваше 85 проценти.
Во споредба со нив, докажаните модели со висока продажба имаа послаб квартал. Дачиа Сандеро (-29 проценти), Пежо 208 (-21 проценти), Дачиа Дастер (-27 проценти) и Нисан Џук (-22 проценти) имаа делумни падови. Форд Куга загуби 15 проценти од продажбата, исто како и кинескиот МГ ЗС (-18 проценти).
