Дарко Јаконов
Автомобилот што му даде ново значење на поимот мултинаменско возило уште се продава во Јужна Америка. Peugeot Partner дури доживеа и моделско освежување, за да привлекува исто толку купувачи и во следните години
Peugeot Partner и Citroen Berlingo беа револуционерната двојка од доцните 1990-ти години. Тие се појавија како свеж и штосен спој на семејно возило и лесен транспортер, беа поевтини од дотераните компакти, а располагаа со многу повеќе можности. Пазарот ги обожуваше, македонскиот особено. Некои пазари уште ја имаат привилегијата да извадат свеж Peugeot Partner од салон, оној од првата генерација.
Француската марка, на којашто честопати ѝ успевало да понуди модели што ги надживуваат и своите наследници, уште го нуди оригиналниот Peugeot Partner на големиот бразилски пазар. Додека Европа штотуку ги добива првите контингенти од комплетно новиот Rifter, во бразилските ценовници на Peugeot се појавува „ново“ моделско годиште на Partner Mk. I.
Бразилскиот Peugeot Partner по традиција вози и на етанол
Во понуда остана само товарната изведба, којашто сега доживеа модернизација. Промени во изгледот се непотребни, мултифункционалниот ван уште го има истиот изглед. Важниот новитет е под хаубата. Таму работи нов 1,6-литарски мотор, којшто во најдобрата традиција на бразилскиот пазар, може да вози и на бензин и на етанол.
Кога моторот согорува бензин, моќноста изнесува 115 КС, кога е етанол, таа се зголемува на 122 КС. Спринтот до темпо сто трае 14,5 секунди, а крајната брзина изнесува 164 километри на час. Сервоуправувањето отсега е стандард, но тоа не е единствениот новитет.
Partner доаѓа стандардно опремен со клима уред, а со доплата и со дигитални инструменти. Тоа му дава посебен печат на автомобилот чијшто оригинален концепт е стар повеќе од две децении. Инструментите се преземени од C4 Picasso, кој сега е преименуван во Space Tourer.
Секако дека и Бразил нема да остане без новиот Rifter. Неговата продажба ќе стартува наесен.
