Десетте години на Пежо 604 се полни со историја, како што доликува на знаменосец на автомобилска марка. Пежо 604 не дојде со задача да го замени 504, туку да качи уште една класа погоре и со тоа да го постави врвот на понудата на француската марка уште повисоко.
На проектот Е24 почна да се работи уште во 1970 година, повторно во соработка со Пининфарина. Лимузината со овој изглед непогрешливо укажува дека потекнува од 1970-те години. Формата е со прави линии и остри агли, потезите на дизајнерите се развлечени, светлата се огромни, браниците се моќни. Внатрешноста е дело на Пол Брак.
Кога автомобилот се појави првпат пред публика, за време на салонот во Париз во 1975 година, изборот се сведуваше на еден мотор, соодветен за знаменосецот на марката. Пежо 604 вози со Ве-6 мотор со ознака ПРВ, од 2.664 сантиметри кубни, со моќност од 136 КС – секако, со карбуратор.
ПРВ е кусо од Пежо, Рено и Волво, односно станува збор за мотор развиен заеднички од трите гиганти. Моторот уште пред тоа се вградуваше во Пежо 504 Купе и Кабриолет. Моторот е вграден надолжно и преку четиристепен мануелен или тристепен автоматски менувач испорачува њутнметри преку карданско вратило до задната оска.
Со изгледот, 604 го следеше примерот на конкуренцијата, но нештата изгледаа сосем различно во поглед на комфорот, просторноста, како и удобните и меки седишта во француски стил.
Стандардната опрема опфаќа сервоуправување, диск сопирачки на сите тркала, а опција беа клима уред или кожена внатрешност. Намерата на Французите беше да создадат модел што исто толку ќе двои со луксузот, како Пежо 601, близу 40 години пред тоа.
Кон завршетокот на 1977 година, во понудата беше воведен Пежо 604 ТИ со Бош К-Џетроник и 144 КС. Пазарот уште повеќе се одушеви кога марката со лавот почна со продажба на 604 Д Турбо во 1979 година. Дизелот од 2,3 литри постигнуваше 80 КС благодарение на турбополначот Гарет Т03. Тоа е воедно и првиот автомобил со турбодизел мотор во Европа.
Во 1983 година, следеа новиот ГТИ и паралелно со него ГТД Турбо, едниот со мотор Ве-6 ПРВ зголемен на 2.849 сантиметри кубни со 155 КС и впрскување на горивото, другиот зголемен на 2.498 сантиметри кубни, со 95 КС. Во двата модели работи 5-степен менувач.
Папи, амбасадори, тркачи
Пред да заврши производството во 1985 година и Пежо 604 да се изгуби од салоните, марката понуди неколку исклучителни изведби на моделот. Повеќето од нив денес се мамка за колекционерите.
Меѓу нив се луксузните лимузини од Елие, изработувани во три различни должини. Една лимузина беше изработена по нарачка на францускиот претседател Жискар д’Естен, за таа да служи при посетата на папата Јован Павле Втори. Неколку примероци беа изработени во изведба Ландуле, а меѓу највпечатливите преработки секако е таа на италијанската Скаљети, со меѓуоскино растојание продолжено за дури 108 сантиметри.
Малку е познато дека Пежо 604 возеше и рели. Во 1981 година, тимот Шион/Гондран учествуваше на Рели Монте Карло. Лимузината се користеше и на Тур де Франс во 1986 година од страна на директорите на трката.
