за

Мерцедес В-Класа и Вито ’24: Секој превоз е со класа

Луксузниот имиџ и довербата во Мерцедес-Бенц досегаат и во делот на доставните возила и престижните ванови. Мак Аутостар почнува со испорака на новото моделско годиште на Вито и В-Класа.

Основата е иста, разликата меѓу Мерцедес-Бенц В-Класа и Мерцедес-Бенц Вито е само во бројот на турите. Додека секојдневиот Вито ќе извози и по пет тури на ден и патниците секако ќе треба да платат соодветен надомест за услугата за превоз, патниците за возењето во луксузната и несекојдневна В-Класа веројатно нема да платат ниту денар. Тоа е целата суштина на овие две возила што ги соединува „само“ ѕвездата.

Различна им е природата на овие ванови на престижната германска марка. Вито директно им носи заработка на компаниите и таксистите, таа е работна алатка, фирма на тркала. Наспроти тоа, В-Класа обично вози за луксузни и скапи ланци хотели, ресорти, задолжително се чуваат во резерва кај рентакар компаниите за посебни пригоди, за важни конференции и конгреси, кога организаторот или самиот хотел треба да ги одушеви своите клиенти или гости преку В-Класа. Тоа значи, овој луксузен ван работи за бизнис што веќе постигнува голема добивка.

Секоја од двете варијанти на ванот од средината на понудата на Мерцедес-Бенц е најдобра за својата намена. Швабите, патем, ја имаат единствената премиум марка што произведува и продава ванови. Ниту Ауди, а уште помалку БМВ, не можат да постигнат добивка во овој бизнис што е далеку од мал, а многу е исплатлив. Амбициозните Кинези не случајно сакаат да зафатат во делот на В-Класа и Вито, па во меѓувреме и Лексус се јавува со ексклузивниот ЛМ.

Различната природа на двата ванови на Мерцедес-Бенц можеше да се забележи многу јасно, преку двата ексклузивни салонски примероци, со коишто Мак Аутостар го одбележа почетокот на продажбата на освеженото моделско годиште на В-Класа и Вито во Македонија.

В-Класа на видеото е во изведбата В 300 д со постојан погон на сите тркала 4Матик. Деветстепен автоматски менувач е стандард, убедува и моќноста од 237 КС. Тоа што дополнително ѝ дава посебност на оваа В-Класа е додадениот пакет АМГ. Со тоа, ванот е браник до браник со Е-Класа или со ГЛЦ. Каросеријата е во продолжената изведба, што со 5,14 метри е за 24,5 сантиметри подолга од стандардната изведба. Постои и посебно долга изведба, што додава до 5,37 метри.

Сцената уште одамна ја познава В-Класа како С-Класа меѓу вановите

Кожата во изведбата Авангард на салонскиот примерок е стандард, што изгледа отмено во светлата беж боја. Електрика и меморија на предните седишта, вентилација и греење, аудио систем Бурмештер, МБУКС систем – многу нешта ја приближуваат В-Класа до лимузините на Штутгарт. Не е ново тоа што сцената уште одамна ја цени В-Класа како С-класа меѓу вановите. Тоа се огледува мошне верно кај овој „автомобил“.

Покрај пакетот АМГ, што вреди близу 5.000 евра и меѓу другото содржи маска со ѕвезди, спортски браници, прагови со хромирани лајсни, па и кровен спојлер, и секако тркала АМГ, во овој препознатливо ексклузивен примерок има и електрична помош за двете странични врати и за багажникот.

 

View this post on Instagram

 

A post shared by Automedia.mk (@automedia.mk)

Мерцедес-Бенц има уште цело изобилство од ставки што може да се изберат, меѓу кои пневматска амортизација Ерматик – заедно со самостојно спуштање на возилото по автопат, дисплеј место внатрешен ретровизор, затемнети задни стакла, вентилација за вториот и третиот ред седишта, па и директорска фотелја, со масажа, амбиентално осветлување и можност за залегнување, што секако и чини преку 5.000 евра.

Цена од преку 100.000 евра не е исклучок кај врвните изведби на В-Класа. Може единствено уште еден чекор погоре отколку во салонскиов примерок во Мак Аутостар, а тоа е директно да се посегне по изведбата Ексклузив, што е препознатлива и по маската во стил со лимузините на Мерцедес-Бенц, каде што сите ставки се веќе вклучени – заедно со ѕвезда на хаубата.

Тоа што В-Класа и Вито не отстапуваат и во конективноста од лимузините на марката, доаѓа од моделското освежување. Од јануари почнаа да се испорачуваат примероците од новото моделско годиште, со зафати и во надворешниот изглед и во внатрешноста. Маската е сменета (со можност да биде обрабена со светлечка лента), браниците се повпечатливи, назад е додадена хромирана лајсна со мошне убедлив натпис Мерцедес-Бенц, задните светла исто така се сменети.

⇒ До видеото од изведбата Марко Поло што неодамна имаше премиера во Мак Аутостар

Диодни приспособливи светла се стандард уште во Авангард, а значително е збогатена и сериската опременост во сите нивоа. Луксузот секако дека се чувствува во кабината, и во изгледот и во животот во неа. Кокпитот е сменет заради двата дисплеи од по 12,3 инчи (31,24 сантиметри) под заеднички панел, нови се и воланите, а и отворите за воздух се лимузински. Промени има и во средишната конзола, со можност за безжичен полнач за телефон.

Системот МБУКС исто така е стандард во целата гама на В-Класа, што меѓу другото ги подразбира и прочуените гласовни команди „Еј Мерцедес“. Целиот овој инфо-забавен систем е унапреден во споредба со претходниот модел, вклучувајќи и побрзи процесори. Збогатени и унапредени се и системите за асистенција.

Сé кај В-Класа во чекор ги следи промените што се случуваат кај лимузините на Мерцедес-Бенц, од МБУКС, преку системите за асистенција, до целта за луксузот да се подигне на следното ниво.

Од сето тоа профитира и Вито, главно во „хардверот и софтверот“ коишто ги дели со престижната В-Класа.

За сите промени во новото моделско годиште во целата гама ванови на Мерцедес-Бенц може да се прочита повеќе на Ново моделско годиште на Вито и Спринтер

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Врвна прецизност и динамика: претставен новиот Кајен ГТС

Рено очекува новите модели да ја качат продажбата во ’24, прометот е пораснат за 1,8%