Дарко Јаконов
Француската метропола Рен нарача 92 комплетно електрични градски автобуси Mercedes-Benz eCitaro. Нарачката се состои од 59 зглобни и 33 единечни автобуси, кои ќе се испорачуваат во периодот меѓу 2022 и 2025 година.
Градот Рен во регионот Бретања, во Франција, избра електрични автобуси Mercedes-Benz eCitaro, како дел од амбициозниот план на мерки за запирање на климатските примени. Тоа е досега најголема нарачка надвор од Германија за автобусите на Mercedes што користат погон на струја.
Автобусите за француската метропола поседуваат осум литиум-јонски батериски пакети од најновата генерација. Пантограф поставен на покривот овозможува батеријата да се полни додека автобусот е во редовна линија и на тој начин се зголемува досегот. Француските eCitaro ќе бидат опремени со напредни системи за асистенција, меѓу нив самостојно запирање при опасност од судир, како и предупредување на возачот при скршнување во десно, доколку во непрегледното подрачје се наоѓа велосипедист или пешак.
Рен е метропола во регионот Бретања, со повеќе од 200.000 жители, односно двојно повеќе, вклучувајќи ги предградијата. Градскиот превоз е мошне развиен и се состои од метро, околу 70 автобуски линии, училишни автобуси и за наем на велосипеди. Градот планира целосна електрификација на автобускиот превоз до 2030 година.
Mercedes го претстави електричниот автобус eCitaro во 2018 година. Неодамна започна производството и на зглобната изведба на автобусот, eCitaro G. Како што објавивме претходно, тоа е прв градски автобус што користи батерија со цврст електролит.
Досегот изнесува до 220 километри. Mercedes нуди бројни можности за изработка на двата модели автобуси по посебна нарачка.
>>> Електричен Mercedes eCitaro е градски автобус на годината
