Дарко Јаконов
Mercedes ја врати доминацијата во делот од пазарот што отсекогаш му припаѓал. Според августовската продажба на германскиот пазар, Mercedes E-Class е пред Audi A6. Уште еден традиционален сегмент е под знакот на сребрената ѕвезда
Сегментот на возила од вишата класа на најголемиот пазар во Европа повторно му припаѓа на Mercedes. Лимузината и комбито од Mercedes E-Class во август постигнаа 3.401 продажби, со што го потиснаа досегашниот лидер Audi A6. Од вкупно 9.631 продадени возила во оваа класа во август, дури 35,3% припаѓаат на моделите со сребрената ѕвезда. Во споредба со истиот месец лани, продажбата на Mercedes E-Class пораснала за 40,2 проценти.
Уште една традиционална класа, којашто е важна и за имиџот и за профитот на секој премиум производител, останува во владеење на Mercedes. Со 640 продадени примероци во август, S-Class постигнува удел од 20,3 проценти меѓу лимузините од луксузниот сегмент.
Наспроти двата сегмента на Mercedes E-Class и S-Class, дури осум од 13 сегменти му припаѓаат на Volkswagen
Затоа, пак, од вкупно 13 сегменти, дури осум му припаѓаат на Volkswagen: Мини возила (Up), градски возила (Polo), компакти (Golf), средна класа (Passat), СУВ-модели (T-Roc), теренски возила (Tiguan), големи ванови (Touran), доставни возила (Transporter).
Единствени увозни модели на првото место во своите сегменти се Renault Scenic, најпродаван миниван со 1.879 примероци во август и удел од 30,8% во сегментот, додека сегментот на камп-возилата му припаѓа на Fiat Ducato, со 1.883 продадени примероци и удел од 58,7 проценти во сегментот. Кај спортските модели е прв Porsche 911, од когошто во август се продадени 850 примероци на германскиот пазар.
Во минатиот месец во земјата се продадени вкупно 316.405 автомобили или за близу една четвртина повеќе отколку во истиот месец лани.
